Душанбе. 11-уми апрел. ОИ «Азия-Плюс» - Чанде қабл раиси шаҳри Душанбе Маҳмадсаид Убайдуллоев бо мақсади рӯшанӣ андохтан ба масъалаи иҷрои қарори Додгоҳи Олии иқтисодии кишвар дар бораи кӯчонидани бозори «Зарнисор» соҳибмулкони ин бозорро ба ҳузур пазируфт.

Чӣ тавре ки сухангӯи раиси пойтахт Шавкат Саидов ба ОИ «Азия-Плюс» хабар дод, дар ҷараёни мулоқот М.Убайдуллоев изҳор доштааст, ки ҳукуматдорони шаҳр қарори додгоҳ оид ба фаъолияти минбаъдаи бозорро дастгирӣ мекунанд. «Раиси пойтахт гуфт, тибқи қарори Додгоҳи Олии иқтисодӣ, соҳибкорон бояд худашон бозорро хароб сохта, агар имконоти молиявӣ дошта бошанд, ба ҳукумати шаҳр ҷиҳати ширкат дар сохтмони иншооти ҷадид, ки тибқи нақшаи генералии шаҳр дар ҷойи бозор бунёд мегардад, муроҷиат намоянд», - изҳор дошт сухангӯи раиси пойтахт.

Ба гуфтаи Ш.Саидов, баҳри дастгирии соҳибкорони ватанӣ Маҳмадсаид Убайдуллоев ба мақомоти салоҳиятдори ҳукумати шаҳр супориш дод, то ки масъалаи истифодаи бинои сеошёнаи бозорро, ки сохтмони он ғайриқонунӣ дониста шуда, тибқи қарори додгоҳ, бояд кӯчонида шавад, ҳаллу фасл созанд ва дар сурати мувофиқати бино ба нақшаи генералии шаҳр, он чун маркази хизматрасонии маишӣ мавриди истифода қарор гирад.