Бар зидди Бузургмеҳр Ёров, вакили дифои зиндонии тоҷик бо иттиҳоми қаллобӣ парвандаи нав боз карда, ӯро аз зиндон ба Боздоштгоҳи муваққатии шаҳри Душанбе бурдаанд. Дар ин бора Бунёди “Бузургмеҳр”, як созмони ҳуқуқӣ, ки қароргоҳаш дар Лаҳистон аст, хабар додааст.

Ҷамшед Ёров, бародари Бузургмеҳр Ёров ҳам изҳороти ин созмонро дар саҳифаи фейсбукии худ бознашр кардааст.

Манбаъ навиштааст, ки парванда “бо моддаи 247, қисми 4, бандҳои “а” ва “б” (қаллобие, ки дар ҳолати ретсидиви махсусан хавфнок ва ба миқдори махсусан калон)-и Кодекси ҷиноятӣ ва дар асоси гӯё аризаи яке аз маҳбусоне, ки ҳамроҳи Бузургмеҳр Ёров дар зиндони шаҳри Ваҳдат адои ҷазо мекард, оғоз карда шудааст”.

“Моҳият ва чузъиёти амалҳое, ки тибқи он нисбати адвокат Бузургмеҳр Ёров парванда боз шудааст, то хол аниқ ва муайян нест. Айни ҳол ин зиндонии сиёсиро то ба охир расидани тафтишоти пешакӣ ва қарори ниҳоии Додгоҳ ба боздоштгоҳи муваққатӣ ё СИЗО-и №1 шаҳри Душанбе гузарондаанд”, - навиштааст Ҷамшед Ёров.

Гуфта мешавад, ки ин моддаи Кодекси ҷиноӣ ҷарима ва ё аз ҳашт то дувоздаҳ сол зиндонро пешбинӣ мекунад.

Бунёди “Бузургмеҳр” аз номи модари Бузургмеҳр Ёров нигаронӣ карда, навиштааст, ки “дар Тоҷикистон ягон ташкилоти адвокатӣ, адвокатҳои шинохта ва ё ташкилотҳои чамъиятие, ки ба ҳимояти шаҳрвандон ва таъмини онҳо бо адвокатҳо машғуланд, аз тарси фишори мақомоти тафтишотӣ ва амниятӣ ҳимояи писарашро ба зимма намегиранд”.

“Вакили дифое, ки аз ҷониби давлат ба Бузургмеҳр Ёров ҷудо шудааст, дар мурофиаҳо ҳамагӣ як ё ду маротиба иштирок кардаасту халос”, - омадааст дар изҳорот.

Ин созмон оғози парвандаи нави ҷиноятиро бар зидди Бузургмеҳр Ёров бофта унвон кардааст.

Парвандаи нав нисбати вакили дифои зиндонӣ, тавре Радиои Озодӣ менависад, аз сӯи Раёсати тафтишоти Вазорати корҳои дохилӣ боз шудааст.

Кушишҳои мо барои дарёфти иттилоъ аз дафтари матбуотии ВКД бенатиҷа анҷом ёфт.

Ёдовар мешавем, ки Бузургмеҳр Ёров яке аз вакилони дифои саршиноси тоҷик аст, ки аз соли 2015 ба ин сӯ дар маҳбас аст. Ӯро барои “қаллобӣ”, “сохтакорӣ”, “таҳқири намояндаи ҳокимият ва беэҳтиромӣ нисбат ба суд” гунаҳкор ва ба 28 соли зиндон маҳкум кардаанд. Бар асоси қонуни афв чаҳор сол муҳлати ҳабсаш кам шудааст.

Худи Бузургмеҳр Ёров ҳамеша ба бегуноҳии худ таъкид кардааст ва ҳукмро дорои ангезаи сиёсӣ номидааст.

Бузургмеҳр Ёров 51-сола ва хатмкардаи факултаи ҳуқуқшиносии Донишгоҳи Миллии Тоҷикистон аст. Дар оғоз муфаттиши Шуъбаи корҳои дохилии шаҳри Душанбе буд. Аз соли 1998 то лаҳзаи боздошт ҳамчун вакили мудофеъ кор мекард ва мудири иттифоқи адвокатии “Сипар” буд.

Дар Telegram, Facebook, Instagram, OK ва ВК бо мо бимонед.