Маркази матбуоти ВКД Тоҷикистон дар барномаи навбатии худ - “Ахбори ВКД” аз ҷузъиёти кушта шудани муҳоҷир аз Тоҷикистон дар Русия дар соли 2021 хабар дод.
Бино ба маълумоти мақомоти тафтишот, сокини деҳаи Киштӯдаки шаҳри Панҷакент Баҳром Алиқуловро ҳамдиёронаш - бародарон Соҳибназар ва Ҷаҳонбек Юсуповҳо бераҳмона куштаанд.
Дар гузориши телевизионӣ гуфта мешавад, Алиқулов муддати 20 сол барои кор ба Русия мерафтааст. Моҳи марти соли 2021 ҷасади Баҳром Алиқулов дар шафати роҳи Ходково-Дмитрови назди ш.Сергиево Посад бо аломатҳои марги маҷбурӣ (бо гулӯи бурида дар дохили халта) дарёфт мешавад.
Мақомоти ҳифзи ҳуқуқи Сергиево Посад тибқи моддаи 105 КҶ Русия парвандаи ҷиноятӣ оғоз карданд, лекин маълум мешавад, ки ӯро ҳамдиёронаш кушта, гумонбарон аллакай ба Тоҷикистон рафтаанд. Барои идомаи тафтишот парванда ба ихтиёри мақомоти ҳифзи ҳуқуқи Тоҷикистон дода шуд.
Ҷасади Баҳром Алиқулов ба ватан интиқол ёфта, дар зодгоҳаш, ки ҷинояткорон ҳам ба онҷо баргашта буданд, ба хок супурда шуд.
Пас аз тафтишоти тӯлонӣ даст доштани бародарон Юсуповҳо ба ин ҷиноят муайян шуда, моҳи ноябри соли 2023 онҳо боздошт шуданд.
Аз рӯи ин парванда ҳамчунин боз 1 хешованди дигари ҷинояткорон - Саддам Юсуфзода боздошт шуд, ки шоҳиди куштор буд, вале ин хабарро пинҳон кард.
Дар гузориши телевизионӣ бародари калонии Юсуповҳо - Соҳибназар ба куштани ҳамдиёраш иқрор шуд.
“Ҷанҷол сар шуда, ӯ ба ман зарба зад. Ӯ зарба зад, ман ҳам. Ман ба ӯ гуфтам, ки ту аллакай 5 сол маро азоб медиҳӣ, ин кайҳост, ки ба ҷонам расидааст...”, - изҳор доштааст ӯ.
![](https://asiaplustj.info/sites/default/files/articles/334465/MyCollages.jpg)
Бародари ӯ Ҷаҳонбек баёнот додааст, ки “Соҳибназар гуфт, ки дар ин бора ба ҳеҷ кас нагӯем”. Шоҳиди ҳодиса Саддам Юсуфзода низ ҳодисаро нақл кардааст.
“Вақте ки ӯ афтод, Соҳибназар ба лагадкӯбии ӯ оғоз кард. Баҳром аз ҳуш рафт. Ман хеле тарсида, ба ҳар ҳол, наздиктар омада, дидам, ки ӯ ҳаракат намекунад. Ин вақт Ҷаҳонбек омад. Ӯ ҳам Баҳромро лагадкӯб карда, сипас бо тасма ба буғӣ кардан оғоз намуд. Чунон сахт буғӣ кард, ки тасма канда шуд. Баъдан Соҳибназар аз кисаи росташ корд бароварда, гулӯи ӯро бурид...”, - гуфтааст ӯ.
Пас аз куштор бародарон Юсуповҳо ҷасади Алиқуловро ба халта андохта, бо мошин ба қисмати дигари Сергиево Посад мебаранд ва мепартоянд.
Тибқи маълумоти мақомоти тафтишот, бародарон Юсуповҳо ва Алиқулов дар бораи иншооти корӣ дар бӯстонсароҳои “Парус” ва “Лесной” баҳсу мунозира карда, бародарон ҳамдиёрашонро ба он гунаҳкор кардаанд, ки иншоотеро, ки бояд онҳо кор мекарданд, аз дасти онҳо гирифтааст.
Дар натиҷа додгоҳ Соҳибназар Юсуповро ба 27 соли зиндони низомаш шадид, бародари ӯро - ба 25 соли зиндони низомаш шадид ва Саддам Юсуфзодаро - ба 4 соли зиндони низомаш умумӣ маҳкум кард.