Душанбе. 26-уми август. «Азия-Плюс» - Шурӯъ аз имрӯз то санаи 7-уми сентябр вакилони палатаи поёнии парлумони ҷумҳурӣ дар тамоми манотиқи кишвар бо интихобкунандагон як силсила мулоқотҳо баргузор менамоянд.

Тавре ба ОИ «Азия-Плюс» котиби матбуотии палатаи поёнии парлумони ҷумҳурӣ Муҳаммадато Султонов хабар дод, зимни вохӯриҳо намояндагони мардумӣ фикру мулоҳизоти аҳолиро, ки ба масоили гуногуни рушди иқтисод, ҳалли мушкилоти бекорӣ, маориф, тандурустӣ ва ҳифзи иҷтимоии аҳолӣ дахл доранд, мавриди омӯзиш қарор хоҳанд дод.

«Зимни мулоқот бо интихобкунандагон вакилони парлумон ҳамчунин ба масъалаҳои таҳкими амнияти ҷумҳурӣ ва ҳифзи истиқлоли давлатии Тоҷикистон низ таваҷҷӯҳи хосса зоҳир хоҳанд сохт», - зикр кард М. Султонов.

Ба гуфтаи номбурда, дар вохӯриҳо интихобкунандагон метавонанд перомуни мавзӯъҳои барояшон муҳим ба вакили худ суол диҳанд ё пешниҳоде дар ин маврид ироа созанд, ки  он ҳангоми таҳия ва қабули қонунҳо ба инобат гирифта хоҳад шуд.