Президенти Тоҷикистон Эмомалӣ Раҳмон ҷиҳати иштирок дар ҷаласаи Шӯрои байнидавлатии сарони кишварҳои узви Иттиҳоди иқтисодии Авруосиё (ЕврАзЭС) бо сафари якрӯза озими шаҳри Маскав шуд.

Бино ба маълумоти як манбаъ аз ҳукумати ҷумҳурӣ, дар ин сафар сарвари давлатро мушовири давлатӣ оид ба сиёсати хориҷӣ Эркин Раҳматуллоев, вазири корҳои хориҷии ҷумҳурӣ Ҳамрохон Зарифӣ, вазири рушди иқтисод ва савдо Шариф Раҳимзода ва дигар шахсони расмӣ ҳамроҳӣ мекунанд.

«Президенти Тоҷикистон аллакай шоми ҳамин рӯз ба ватан бармегардад, зеро рӯзи 20-уми март иштироки сарвари давлат дар маросими мавриди истифода қарор гирифтани бинои нави Китобхонаи миллии Тоҷикистон ва вохӯрии ӯ бо равшанфикрони кишвар дар он ба нақша гирифта шудааст», - гуфт манбаъ.

Ёдрас мекунем, ки 10-уми октябри соли 2000-ум дар пойтахти Қазоқистон - шаҳри Остона шартнома дар бораи таъсиси Иттиҳоди иқтисодии Авруосиё (ЕвраЗЭС) ба имзо расида, пас аз тасдиқи он аз ҷониби кишварҳои узви иттиҳод 30-уми майи соли 2011 ба фаъолият шурӯъ кард.

Аз замони таъсиси Иттиҳоди иқтисодии Авруосиё панҷ давлат – Белорус, Қазоқистон, Қирғизистон, Русия ва Тоҷикистон аъзои он мебошанд.