Президенти Тоҷикистон Эмомалӣ Раҳмон ҷиҳати иштирок дар нишасти сарони кишварҳои ИДМ, ки рӯзи 13 октябр дар шаҳри Бишкек доир мегардад, ба Қирғизистон сафар мекунад. Дар ин бора ба “Азия-Плюс” аз хадамоти матбуоти сарвари давлати Тоҷикистон хабар доданд.

Зикр шуд, ки сарони давлатҳои Иттиҳод маҷмӯи васеи масоил, аз ҷумла ҳамкориҳо дар соҳати тиҷорату иқтисодро баррасӣ мекунанд.

Ба иттилои манбаъ, дар ин чорабинӣ қарорҳои муҳими марбут ба тавсеъаи ҳамкорӣ дар доираи ИДМ дар соҳаҳои тиҷорату иқтисод ва фарҳанг қабул хоҳанд шуд.

Дар хадамоти матбуоти президент зикр карданд, ки ҳоло маълум нест, ки миёни сарони давлатҳо вохӯриҳои дуҷониба баргузор мешаванд ё не.

Ёдрас мекунем, ки моҳи июни соли 2023 Эмомалӣ Раҳмон барои иштирок дар нишасти”Иттиҳоди Аврупо - Осиёи Марказӣ” аз Бишкек боздид карда буд.

Қобили зикр аст, ки айни замон дар қаламрави кишвари ҳамсоя машқҳои муштараки Неруҳои дастаҷамъии СААД “Бародарии шикастнопазир-2023” ҷараён доранд, ки дар он низомиёни тоҷик низ иштирок доранд.

Қобили зикр аст, ки пас аз даргириҳои марзӣ байни Тоҷикистону Қирғизистон низомиёни тоҷик бори аввал барои иштирок дар машқҳо ба қаламрави Қирғизистон ворид шуданд.

Байни Тоҷикистону Қирғизистн дар масъалаи таъйин ва аломатгузорӣ дар сарҳади давлатӣ баҳсҳо вуҷуд доранд, ки баъзан ба муноқишаҳои марзӣ боис мегарданд.

Масофаи сарҳади байни давлатҳо ҳудуди 980 километрро ташкил медиҳад. Айни замон зиёда аз сеяки ҳиссаи хатти сарҳад муайян ва аз ҷониби давлатҳо эътироф шудааст. Дар бораи беш аз 400 километри боқимонда то ҳол баҳсҳо идома доранд.

Гуфтушунидҳо дар ин хусус аз моҳи декабри соли 2002 идома доранд. Чанд рӯз пеш пас аз вохӯрии навбатӣ зикр шуд, ки ҷонибҳо ба хотимаи гуфтушунидҳо ва ояндаи наздик муқаррар намудани хати сарҳад наздик шудаанд.

Дар Telegram, Facebook, Instagram, OK ва ВК бо мо бимонед.