Аз 23 то 26 июл президенти Муғулистон Ухнаагийн  Хурэлсух бо сафари давлатӣ аз Тоҷикистон боздид мекунад. Сафар бо даъвати президенти Тоҷикистон Эмомалӣ Раҳмон сурат мегирад.

Тавре ки Вазорати корҳои хориҷии Тоҷикистон хабар медиҳад, дар доираи ин сафар мулоқотҳои дуҷониба дар сатҳи олӣ дар назар буда, инчунин имзои як қатор санадҳoи дуҷонибаи ҳамкорӣ ба нақша гирифта шудааст.

Қобили зикр аст, ки муносибатҳои тиҷоратӣ байни Тоҷикистон ва Муғулистон начандон дар ҳоли рушд қарор доранд, зеро ҳарду кишвар ҳам бештар таҳвилгарони маҳсулоти ашёи хом мебошанд.

Бино ба маълумоти Агентии омори Тоҷикистон, ҳаҷми умумии гардиши молу маҳсулот байни Тоҷикистон ва Муғулистон дар зарфи 5 моҳи соли 2025 ҳамагӣ ҳудуди 172 ҳазор долларро ташкил дода, ҳамаи ин маблағ ба воридоти маҳсулот аз Муғулистон ба ҷумҳурии мо рост меояд.

Соли 2024 ҳаҷми савдои дуҷониба байни кишварҳо 50,8 ҳазор долларро ташкил дод, ки аз миқдор бо 43,5 ҳазор доллар  аз Муғулистон ба Тоҷикистон молу маҳсулот ворид шуда, боқимонда 7,3 ҳазор долларро содирот аз Тоҷикистон ташкил медиҳад.

Дар Telegram, Facebook ва Instagram бо мо бимонед.