Палатаи поёнии парлумони ҷумҳурӣ созишнома миёни Тоҷикистону Русия дар бораи ҳамкорӣ оид ба масоили марзиро тасдиқ кард.

Созишномаи мазкурро дар таърихи 2-юми сентябри соли гузашта сарони кишварҳои Тоҷикистону Русия Эмомалӣ Раҳмон ва Дмитрий Медведев дар Душанбе ба имзо расонида буданд.

Дар он ҳузури мушовирони русиягӣ оид ба масоили марзӣ дар ҳайати гурӯҳи ҳамкориҳои сарҳадӣ ва танзими масоили муборизаи муштарак алайҳи терроризм, ифротгароии динӣ, муомилоти ғайриқонунии яроқу аслиҳа ва маводи нашъаовар пешбинӣ шудааст.

Зимни шарҳи санади мазкур ба вакилони палатаи поёнии парлумон фармондеҳи қувваҳои сарҳадбонии ҷумҳурӣ Шералишо Мирзоев зикр кард, ки иштироки намояндагони Русия дар такмили низоми муҳофизати сарҳади давлатӣ, таъмини амнияти марз ва тайёр кардани кадрҳо барои нерӯҳои марзбонӣ дар назар аст.

Раиси палатаи поёнии парлумони кишвар Шукурҷон Зуҳуров таъкид кард, ки лоиҳаи ҳуҷҷати мазкур соли 2011 таҳия гардида, ба манфиатҳои ҳарду давлат ҷавобгӯ аст. «Тибқи созишномаи нав, марзбонони русиягӣ минбаъд низ ба ҳамтоҳои тоҷики худ дар омодасозии кадрҳо, амалисозии ҳамлу нақли бор тавассути нақлиёти ҳавоӣ ва муҷаҳҳаз кардани марзи давлатӣ бо таҷҳизоти муҳандисӣ кӯмак мерасонанд», - гуфт ӯ.

Ёдрас мекунем, ки рӯзи шанбеи ҳафтаи гузашта бо ташаббуси президенти Русия сӯҳбати телефонии сарони кишварҳои Тоҷикистону Русия Эмомалӣ Раҳмон  ва Дмитрий Медведев баргузор шуд. Бино ба маълумоти хадамоти матбуоти президенти Русия, дар он аз ҷумла масъалаи вазъи кунунӣ ва дурнамои ҳамкориҳои низомӣ ва низомиву техникӣ ва ҳамчунин таҳкими заминаи қарордодӣ-ҳуқуқии он баррасӣ шуд.