Радиои «Озодӣ» хабар медиҳад, ки як манбаи наздик ба ҳукумати Бадахшон дар суҳбати телефонӣ гуфтааст, ба гурӯҳҳои мусаллаҳ фурсат дода шуд, ки то нимаи рӯзи шанбе силоҳҳои худро ба замин гузоранд. То ин муҳлат намояндагони гурӯҳҳои мусаллаҳ бояд аслиҳаи худро супурда, таслим шаванд.

Ба иттилои манбаъ, вазъ ба сурати умумӣ дар Хоруғ ором аст ва гаштугузори мардум дар хиёбонҳо ҳангоми рӯз бештар шудааст. Мағозаҳо боз буда, субҳи имрӯз терминали Хоруғ ба кор шурӯъ кард ва аз истгоҳи нақлиёти инҷо мусофирон ба тарафи Душанбе ҳаракат карданд. Зикр мегардад, ки зиндагӣ то андозае ба маҷрои маъмулӣ медарояд.

Қаблан як манбаъ аз ВКД ҶТ хабар дода буд, ки имрӯз то соати 12-и рӯз намояндагони гурӯҳҳои мусаллаҳ мебоист аслиҳаи худро ба кормандони Раёсати умури дохилии Бадахшон месупориданд, вале дар ҷойи пешакӣ таъингардида ҳозир нашудаанд.

Дар ҳамин ҳол, дар шабакаи интернет ҳарчи бештар аксу наворҳои видеоӣ аз рӯйдодҳои ахири Хоруғ пайдо мешаванд. Чанде пеш акси бинои мактаб-интернати оташгирифта гузошта шуда буд. Имрӯз хабаргузории Рейтер аксеро аз маросими ба хок супурдани ҳалокшудагон зимни амалиёти низомӣ манзур кардааст.

---