Дар маҳаллаи 103-юми пойтахт сухангӯи Хадамоти гумруки назди ҳукумати ҶТ Абдураҳим Умаров мавриди лату кӯби афроди ношнос қарор гирифт. Мақсади лат кӯб ва шахсияти ин афрод ҳанӯз маълум нест.

Тавре ба ОИ «Азия-Плюс» корманди хадамоти мазкур Нурулло Шарифов хабар дод, ба А.Умаров шоми рӯзи 27-уми феврал аснои бозгашташ аз кор ба хона ҳамла сурат гирифта, худи ҳамон рӯз ӯ ба беморхона мунтақил шудааст.

«Айни замон ӯ дар госпитали ВКД бистарӣ буда, ҳарчанд дар ҷисму рӯяш осори лату кӯб аён бошад ҳам, вале ӯ худро хуб ҳис мекунад. Табибон мегӯянд, ки аллакай рӯзи шанбе ӯро рухсатӣ медиҳанд», - иброз дошт вай.

Ба қавли ӯ, мақсадҳои ин амал ба касе маълум нест, вале дар ВКД аз рӯи ин ҳодиса парвандаи ҷиноӣ боз шуда, тафтишот ҷараён дорад. «Худи Умаров изҳор кард, ки ба ӯ якчанд нафар мардон ҳамла оварда, пас аз лату кӯб дарҳол аз ҷойи ҳодиса ғайб задаанд ва ӯ бо ин шасхон шинос набуда, аз сабабҳои ҳуҷуми онҳо низ огаҳие надорад», - афзуд номбурда.