Шоми рӯзи панҷшанбеи ҳафтаи равон дар шаҳри Читаи Русия як муҳоҷири кории тоҷик бо истифода аз силоҳи оташфишон ба қатл расонида шуд.

Ин шаҳрванди 29-солаи Тоҷикистон дар яке аз дӯконҳо дар кӯчаи Токмаково ба фурӯши мева машғул будааст.

Тибқи маълумоти мавҷуда, дар дохили дӯкон шахсони номаълум ба сар ва бадани ӯ аз силоҳ оташ мекушоянд, ки дар натиҷа ӯ дар ҷойи ҳодиса ба ҳалокат расидааст.

Мақомоти тафтишот баргузор намудани ташхиси судиву тиббиро таъин кардаанд. Ҳамчунин барои муайян намудани навъи силоҳ низ ташхис гузаронида мешавад.

Гуфта мешавад, аз рӯйи ин далел бо аломатҳои содир гардидани ҷиноят мутобиқи моддаи 105, қ. 1-и Кодекси ҷиноии Федератсияи Русия (Одамкушӣ) парвандаи ҷиноӣ боз шудааст.