17-уми декабр дар толори консертии «Кохи Суруш»-и пойтахт чорабинии бошукӯҳ – маросими супурдани ҷоизаи мусиқии «Tarona Music Award-2022» баргузор мешавад. Чорабинии имсола ба 20-солагии таъсисёбии Радиои Азия-Плюс, нахустин радиои мустақил дар Душанбе, бахшида мешавад.
Манижа Ахмедова, директори ин радио мегӯяд, ки дар ин маросим ҳам маъруфтарин устодони саҳнаи тоҷик ва ҳам ситораҳои навраси кишвар ширкат хоҳанд кард. Дар чорабинии асосии мусиқии сол, ки охири соли 2022 баргузор мешавад, тамошобинон намоиши фаромӯшнашавандаро бо иштироки сарояндагони дӯстдоштаи худ метавонанд бубинанд.
Ҷоизаи «Tarona Music Award шакли нави ҷоизаи мусиқии “Суруди сол” аст, ки Радиои Азия-Плюс соли гузашта ба ифтихори 30-умин солгарди истиқлоли Тоҷикистон дубора эҳё кард. Бори аввал ин чорабинӣ аз ҷониби Азия-Плюс моҳи майи соли 2003, дар толори консертии «Кохи Борбад»-и Душанбе баргузор шуда буд.
“Суруди сол” баъдан аз сӯйи Эмомалӣ Раҳмон, раисиҷумҳури Тоҷикистон, пуштибонӣ ёфт. Ӯ шахсан ба ин маросим ҳамроҳ бо аъзои ҳукумат ва аъзои порлумон омада, ҳатто дар саҳна суруди "Гӯшаи бом"-ро ҳамроҳ бо овозхони маъруф Сироҷиддин Фозилов иҷро кард. Пас аз ин раисиҷумҳур рост дар толор эълон кард, ки аз ин ба баъд 23 май дар Тоҷикистон ҳамчун “Рӯзи ҷавонон” таҷлил мешавад.
Аз он замон то кунун маросими супоридани ҷоизаи мусиқии "Азия Плюс" пайваста яке аз рӯйдодҳои дурахшон дар ҳаёти мусиқии Тоҷикистон эътироф мешавад.
Кӣ барандаи ҷоизаи мусиқии Тарона дар соли 2022 шуд, мо ба зудӣ эълон хоҳем кард - бохабар бошед!
Ҷоизаи мусиқии Тарона соли гузашта чӣ гуна буд, дар шарҳи кӯтоҳ бубинед.
Руcский