Корпоратсияи Meta Platforms, ки молики шабакаҳои иҷтимоии Facebook, Instagram ва мессенҷери Whatsapp мебошад, эълон кард, ки ба аз кор озод кардани 10 ҳазор нафар кормандони худ омодагӣ мегирад. Ин навбати дуюми ихтисори бузургмиқёс дар Meta тайи ним соли ахир мебошад. Моҳи ноябр ширкат 11 ҳазор нафар кормандонро ихтисор карда буд, менависад ВВС.
Роҳбари корпоратсия Марк Сукерберг дар як изҳорот ба кормандонаш гуфтааст, ки ихтисорот, ба қавли ӯ, "вазнин" хоҳад буд ва як қисми нақшаи солонаи ширкат бо номи "Соли самаранокӣ" мебошад. Ширкат инчунин аз қабули коргарон барои 5 ҳазор ҷойҳои кории холии мавҷуда худдорӣ мекунад.
Сукерберг бар ин назар аст, ки соли 2022, вақте ки даромади Meta ба таври ҷиддӣ коҳиш ёфт, барои ширкат "аломати ҳушёркунанда ва ташвишовар" буд.
Аз омилҳое, ки сарнавишти ояндаи ширкатро муайян мекунад, Сукерберг афзоиши фоизи қарзҳо, бесуботии геополитикӣ дар ҷаҳон ва танзими шадидтари бозорро номбар кардааст.
“Фикр мекунам, мо бояд ба он омода бошем, ки ин воқеияти нави иқтисодӣ дар тӯли солҳои оянда боқӣ мемонад”, - изҳор доштааст Сукерберг.
Ихтисороти аввал дар воҳидҳои техникии ширкат охири моҳи апрел ва дар воҳидҳои тиҷоратӣ - охири моҳи май оғоз мешаванд. Ихтисорот нахуст ба воҳидҳои кадрӣ эълон мешавад.
Қисме аз муроҷиати Сукерберг ба бозгашти кормандони техникии Meta барои фаъолият дар дафтари корӣ дахл дорад. "Дар марҳилаҳои аввали кор муҳандисон агар ҳадди аққал се маротиба дар як ҳафта ба дафтари корӣ оянд, ба ҳисоби миёна самараноктар фаъолият мекунанд", - гуфтааст роҳбари Meta.
Қаблан дар Meta изҳор дошта буданд, ки дар семоҳаи охири соли 2022 фоидаи ширкат 4% коҳиш ёфтааст, ҳарчанд дар тӯли сол он ҳанӯз ҳам аз 23 миллиард доллар зиёд шуд.
Meta ягона ширкате нест, ки дар бахши IT (технологияҳои иттилоотӣ) теъдоди коргаронро кам мекунад. Alphabet, ширкати молики Google, алакай 12 ҳазор нафарро ихтисор намуда, Amazon эълом доштааст, ки 18 ҳазор нафарро ба далели "номуайянии иқтисодӣ" аз кор озод мекунад.
Ба иттилои торнамои layoff.fyi, ба сурати умум соли 2023 дар бахши IT зиёда аз 128 ҳазор нафар бо сабаби ихтисор аз кор озод карда шудаанд.
Руcский