Кумитаи баррасии сабабҳои ҳодисаи сӯхтор дар бандари “Шаҳид Раҷоӣ” дар шаҳри Бандар Аббоси вилояти Ҳурмузгони Эрон натиҷаҳои аввалияи тафтишоти худро эълон карда, гуфтааст, ки сабаби ҳодиса риоя накардани қоидаҳо ва тадбирҳои бехатарӣ мебошад.

Хабаргузории “Ирна” аз қавли Вазорати корҳои дохилии Эрон навиштааст, ки сӯхтор шоми 28-уми апрел пурра хомӯш карда шудааст. Аммо Муҳаммад Ошӯрӣ Тозиёнӣ, раиси вилояти Ҳурмузгон гуфтааст, ки амалиёти наҷот ва кумаки осебдидагон идома дорад ва эҳтимол поксозии минтақа чанд рӯз давом ёбад.

Ба гуфтаи ӯ, то ҳол теъдоди ҷонбохтагон дар натиҷаи ин таркиш ба 70 нафар расид, 22 нафар бедараканд ва ҷасади 22 каси дигар шиносоӣ нашудааст. Вай гуфтааст, ки табибон талош доранд ҳувияти ин ҷасадҳоро маълум кунанд.

Қаблан, яке аз фарзияҳо нодуруст нигаҳ доштан ва рафтор бо маводи хатарноки тарканда, ки дар контейнери таркибҳои истеҳсоли сӯзишворӣ барои мушакҳо ҷойгир буд, гуфта мешуд.

Дар пайи инфиҷор дар шаҳри Бандар Аббос дирӯз, 28-уми апрел дар саросари Эрон мотами миллӣ эълон шуда, рӯзи 27-уми апрел дар тамом вилояти Ҳурмузгони ин кишвар давоми се рӯз азои умум эълом шуда буд.

Эмомалӣ Раҳмон, президенти Тоҷикистон дар робита ба ин инфиҷори шадид ба раиси ҷумҳури Эрон Масъуд Пизишкиён барқияи изҳори тасаллӣ ирсол намуд.

Таркиш дар шаҳри Бандар Аббос дар соҳили Халиҷи Форс дар ҷануби Эрон нифирӯзии 26-уми апрел рух дод ва дар пайи он, тибқи маълумоти расмӣ, то ҳол 70 кас фавтида, беш аз 1200 кас маҷруҳ шудаанд. Хисороти молии ин ҳодиса то ҳол эълон нашудааст.

Дар Telegram, Facebook ва Instagram бо мо бимонед.