Дар бораи сафари қарибулвуқӯъи сарвари давлати ҳамсоя ба Тоҷикистон дар мақолаи худ директори Пажӯҳишгоҳи таҳқиқоти стратегӣ ва байниминтақавии назди президенти Ӯзбекистон Владимир Норов хабар додааст, ки дар саҳифаи расмии Пажӯҳишгоҳ дар Facebook нашр шудааст.
«Аллакай муддати як сол аст, ки дипломатияи Ӯзбекистон бо роҳбарии президент Мирзиёев сиёсати таҳкими муносибатҳои ҳамҷаворӣ бо ҳамаи кишварҳои ҳамсояро амалӣ месозад, - навиштааст Владимир Норов. - Ин натанҳо дар суръатбахшӣ ва тавсеъаи робитаҳои байнидавлатӣ дар сатҳҳои гуногун, балки ҳамчунин дар рӯҳияи қавии Тошканд ҷиҳати дарёфти роҳу воситаҳои созишҳои оқилона дар ҳалли мухолифатҳои пешина бо ҳамсоякишварҳо низ зоҳир мегардад».
Ба навиштаи ӯ, қобили таваҷҷуҳ аст, ки тайи моҳҳои охир роҳбари Ӯзбекистон аллакай чандин маротиба бо ҳамаи сарони ҳамсоякишварҳо вохӯриҳои расмиву ғайррасмӣ ва корӣ баргузор намуд.
«Аз Туркманистону Қазоқистон ва Қирғизистон боздид намуда, баҳри сафар ба Тоҷикистон омодагӣ мегирад. Дар маҷмӯъ ҷумҳурӣ барои таъмини манфиатҳои мардуми кишварҳои минтақаи Осиёи Марказӣ ҳамин сиёсатро роҳандозӣ ва идома хоҳад дод», - қайд кардааст Норов.
Қобили зикр аст, ки охири моҳи октябр сарони кишварҳои Тоҷикистону Ӯзбекистон ба муносибати 25-умин солгарди роҳандозии муносибатҳои дипломатӣ байни давлатҳо ба ҳамдигар барқияҳои табрикӣ ирсол карданд.
Ёдрас мекунем, ки қаблан як манбаи «Азия-Плюс» аз доираҳои ҳукумати ҷумҳурӣ сабаби ба сафари Тоҷикистон шитоб надоштани президенти Ӯзбекистонро шарҳ дода буд. Ба қавли ӯ, «айни замон барои ташкили сафари давлатии Шавкат Мирзиёев ба Тоҷикистон заминаҳо фароҳам оварда мешаванд».
Ӯ қайд карда буд, ки муддати чандин моҳ комиссияҳои байниҳукуматии Тоҷикистону Ӯзбекистон оид ба масоили таъйин ва аломатгузории сарҳади давлатӣ ва ҳамкории тиҷоративу иқтисодӣ фаъолона машғули кор буда, санаи сафари президенти кишвари ҳамсоя маҳз ба натиҷаи кори онҳо вобаста аст.
«Барои анҷоми сафари Шавкат Мирзиёев ба Тоҷикистон омода кардани лоиҳаҳои шартнома ва созишномаҳои байниҳукуматӣ зарур аст, - иброз дошта буд манбаъ. - Ман аз эҳтимол дур намедонам, ки аз рӯи натиҷаҳои сафари зикршуда Душанбе ва Тошканд дар бораи шарикии стратегӣ шартнома ба имзо мерасонанд. То имрӯз Тоҷикистон бо Русия, Қазоқистон ва Чин чунин шартнома дорад».
Зимнан зикр гардида буд, ки дар ҷараёни сафари Шавкат Мирзиёев ба Душанбе, ки ояндаи наздик ҳатман сурат мегирад, ҷонибҳо ният доранд, ки як бастаи бузурги созишномаҳои байнидавлатиро ба тасвиб расонанд ва шумори он нисбат ба натиҷаҳои сафари президенти Ӯзбекистон ба Ашқободу Остона ва Бишкек зиёдтар хоҳад буд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
Спасённые от дифтерии. Входите ли вы в их число?
Кто из таджикистанцев будет бороться за медали на домашнем «Большом шлеме»?
Нацбанк Таджикистан второй раз с начала года снижает ставку рефинансирования
США ограничивают экспорт оружия странам с «высоким риском», в том числе Таджикистану
Коженов: Массового отъезда граждан Таджикистана из России не наблюдается
Сильные осадки в Таджикистане вызвали сход селей по стране: размыты дороги и приусадебные участки
Какое влияние будет иметь на таджикских бизнесменов введение визового режима с Турцией?
В Душанбе с двухдневным визитом прилетит президент ЕБРР Одиль Рено-Бассо
В России для мигрантов ужесточают правила сдачи экзамена по русскому
Узбекистан направит более 10 тысяч медсестер и врачей на заработки в Великобританию
Все новости
Авторизуйтесь, пожалуйста