Аз рӯйи натиҷаҳои соли 2020 ҳаҷми сармоягузории андӯхтаи Чин ба иқтисоди Тоҷикистон 3 млрд 15 млн сомониро ташкил медиҳад, хабар медиҳад Кумитаи давлатии сармоягузорӣ ва идораи амволи давлатии ҷумҳурӣ.

Соли 2020 аз Чин ба Тоҷикистон 152 млн доллар сармоя ворид шудааст, ки 120 млн доллараш сармоягузориҳои мустақим мебошад.

Ҳиссаи сармоягузории Чин ба иқтисоди ҷумҳурӣ дар соли гузашта 35,5% аз ҳаҷми умумии сармоягузориҳои ҷалбшудаи хориҷиро ташкил медиҳад.

Соли 2020 вуруди сармояи хориҷӣ дар маҷмӯъ 428,4 млн долларро ташкил дод, ки 162,5 млн доллараш сармоягузориҳои миустақим ва 265,9 млн доллар - дигар сармоягузориҳо (қарзҳои имтиёзнок ва дигар маблағгузориҳо) мебошанд.

Қобили зикр аст, ки сармоягузориҳои Чин ба иқтисоди Тоҷикистон аз нимаи дуюми солҳои 2000-ум оғоз шуданд.

Сармоягузориҳои аввалин ва нисбатан бузург аз Чин ба Тоҷикистон соли 2007 баъди имзои Шартномаи ҳамсоягии нек, дӯстӣ ва ҳамкорӣ байни кишварҳо сурат гирифтанд.

Сармоягузориҳои бештар назарраси Чин пас аз ҳаллу фасли масоили марбут ба қаламрав байни ҳар ду кишвар дар соли 2011 амалӣ шуд.

Давоми солҳои 2007-2020 ба рушди иқтисоди Тоҷикистон аз 65 кишвари саросари дунё зиёда аз 10,3 млрд доллар сармоягузорӣ ҷалб шуд, ки ҳудуди 30%-и он ба Чин рост меояд.

Дар ин давра аз Русия 1,6 млрд, ИМА - 703 млн, Британияи Кабир - 694 млн ва Қазоқистон - 577 млн доллар сармоягузорӣ ҷалб шудааст.

Сармоягузориҳои Чин қариб дар ҳамаи соҳаҳои иқтисоди Тоҷикистон ба мушоҳида расида, ба соҳаҳои иктишоф ва истихроҷи канданиҳои фоиданок, алоқа, сохтмон, хизматрасониҳои молиявӣ, электроэнергетика, зербино саноати кимиё ва нассоҷӣ, инчунин бахши кишоварзӣ ва коркарди маҳсулоти кишоварзӣ афзалият дода мешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.