Душанбе. 7-уми апрел. ОИ «Азия-Плюс» - Се донишҷӯи тоҷики муқими Амрико дар ҳисоби даставии мусобиқоти қаҳрамонии кушоди ИМА оид ба таэквондо пирӯз гардиданд.

            Тавре аз сарчашмаҳои мӯътамад ОИ «Азия-Плюс» огаҳӣ ёфт, дар мусобиқа ба ҷуз варзишгарони амрикоӣ, инчунин намояндагони давлатҳои Канада, Мексика, Колумбия ва Перу низ ширкат варзидаанд. Тоҷикистонро донишҷӯёни коллеҷи Майами (ИМА) Бахтовар Донизода, Парвиз Муродов ва донишҷӯи Донишгоҳи славянии Русияву Тоҷикистон Рустам Ӯлмасов намояндагӣ карданд.

            Дар гурӯҳи синнусоли худ Б.Донизода ва Р.Ӯлмасов ба даври ниҳоӣ роҳ ёфта, Р.Ӯлмасов унвони қаҳрамони мутлақи ИМА оид ба таэквондоро соҳиб шуд.

            Ёдрас мекунем, ки Рустам Ӯлмасов Тоҷикистонро дар бисёр мусобиқоти байнулмилалӣ намояндагӣ карда, айни замон дар курсҳои омӯзиши забони англисӣ дар Майами қарор дорад.