Дар робита ба афзоиши ҳаҷми содироти гази моеъ ба хориҷи кишвар, Қазоқистон нархи онро боло бурд.

Бино ба иттилои хадамоти матбуоти Вазорати энергетикаи ин кишвар, ахиран дар минтақаҳои ҷудогонаи Қазоқистон камбуди ин навъи сӯзишворӣ ба мушоҳида расида, бинобар сабаби нархи баланди яклухти гази моеъ дар кишварҳои ҳамсоя, аз ҷумла Русия - 59019 танга (170 $) ва Тоҷикистон - 104864 танга (304 $) барои 1 тонна, сӯзишворӣ ба ин бозорҳо бештар интиқол меёбад, зеро барои истеҳсолкунандагон фурӯш дар ин бозорҳо фоидаовартар аст.

«Дар чанде аз минтақаҳои кишвар камбуди гази моеъ ба вуҷуд омада, аз ин рӯ, бо мақсади таъмини устувори бозори дохилӣ бо ин навъи сӯзишворӣ, арзиши яклухти он аз 11033 танга (32$) то ба 23106 танга (67$) боло бурда шуд», - омадааст дар хабар.

Қобили зикр аст, ки Қазоқистон яке аз кишварҳои асосии таъминкунандаи бозори Тоҷикистон бо гази моеъ маҳсуб меёбад.

Тибқи маълумоти Агентии омори назди президенти ҶТ, тӯли 6 моҳи соли ҷорӣ ба Тоҷикистон 163,3 ҳазор тонна гази моеъ ворид карда шудааст, ки нисбат ба ҳамин давраи соли гузашта 6,1% зиёд буда, қариб 70%-и аз ҳаҷми умумии гази моеъи воридшуда - ба Қазоқистон, беш аз 25% - ба Русия ва боқимонда - ба Туркманистон рост меояд.

Дар ҳамин ҳол, мувофиқи маълумоти Вазорати рушди иқтисод ва савдои ҷумҳурӣ, айни замон беш аз 60%-и воситаҳои нақлиёти Тоҷикистон ба сифати сӯзишворӣ аз гази моеъ истифода мекунанд.