Шумори дорандагони кортҳои пластикии «Амонатбонк» дар вилояти Суғд ба санаи 1 июли соли 2016 ба беш аз 304 ҳазор нафар расид.

Аз филиали БДА «Амонатбонк» дар вилояти Суғд ба «Азия-Плюс» иттилоъ доданд, ки имрӯз кормандони корхонаву ташкилотҳои ҳамаи 18 шаҳру навоҳии вилоят музди меҳнаташонро тариқи кортҳои пластикии «Амонатбонк» дастрас мекунанд.

«Нафақахӯрони 11 шаҳру навоҳии вилоят, ки шуморашон 172 ҳазор нафар ё худ 56,6% аз шумори умумии дорандагони кортҳои «Амонатбонк»-ро ташкил медиҳад, низ нафақаашонро тавассути кортҳои ин бонк мегиранд», - гуфт манбаъ.

Ба иттилои манбаъ, то охири сол роҳандозии пардохти нафақаи бознишастагони ноҳияҳои Бобоҷон Ғафуров, Конибодом ва Ҷаббор Расулов низ бо кортҳои «Амонатбонк» дар назар аст.

Зимнан зикр гардид, ки айни замон дар қаламрави минтақаи шимоли ҷумҳурӣ 44 адад банкоматҳои махсус, 185 адад посттерминалҳо ва 144 адад марказҳои хизматрасонии БДА «Амонатбонк» амал мекунанд.