Хизматчиёни ҳарбии пойгоҳи низомии 201-уми Русия омодагии худро ба кумак дар пешгирии обхезиҳо ба сокинони Кӯлоб изҳор карданд.

Ба гуфтаи сардори шуъбаи таъминоти иттилоотии Ҳавзаи низомии марказӣ подполковник Евгений Мешков, бо ин мақсад дар шаҳраки низомии Кӯлоб як гуруҳи махсус оид ба пешгирӣ ва бартараф кардани оқибатҳои обхезиҳо таъсис дод шуда, ба ҳайати он хизматчиёни ҳарбии воҳидҳои муҳандисӣ шомиланд ва гуруҳ бо техникаву таҷҳизоти зарурӣ таъмин аст.

«Расонидани кумаки зарурӣ ба аҳолӣ зимни рух додани ҳолатҳои фавқулода, андешидани чораҳои пешгириву огоҳкунӣ ва бартараф сохтани оқибатҳои офати табиӣ аз ҷумлаи вазифаи асосии гуруҳи махсус аст», - гуфт Е.Мешков.

Ба қавли вай, ин вазифаҳоро низомиён дар ҳамдастӣ бо намояндагони Кумитаи ҳолатҳои фавқулода ва мудофиаи граждании назди ҳукумати ҶТ ва дигар мақомоти дахлдори кишвар ба иҷро хоҳанд расонид.

Номбурда ҳамчунин гуфт, дар машварати махсус фармондеҳи пойгоҳи низомии 201-уми Русия Сергей Рюмшин изҳор кардааст, ки барои роҳ надодан ба ҳодисаҳои фоҷеабори монанд ба моҳи майи соли 2010, ки бар асари он аҳолии осоишта ба ҳалокат расидаву садҳо манзили зист пурра хароб гардида буданд, низомиён омодаанд дар мубориза бо офат ба сокинони Кӯлоб ҳамаҷониба дасти ёрӣ дароз кунанд. «Пойгоҳи низомии Русия ба расонидани кумаки зарурӣ баҳри наҷоти ҳаёти мардум омода аст», - таъкид кардааст С.Рюмшин.