Ҳаҷми зиёни расида ба қатораи самти Маскав-Душанбе то ҳол мавриди ҳисобу китоб қарор дорад, вале аллакай ҳозир дар КВД «Роҳи оҳани Тоҷикистон» тахмин мезананд, ки ҳаҷми зарар 1,5 ҳазор сомонӣ (каме бештар аз 300 $)-ро ташкил хоҳад дод.

Тавре ба ОИ «Азия-Плюс» аз корхонаи мазкур хабар доданд, таҳқиқи ҳодисаи ҳамла ба қатораи самти Маскав-Душанбе зимни таваққуфи техникӣ дар истгоҳи Терновкаи Русия то ҳанӯз комилан анҷом наёфта, як комиссияи махсус то ҳол рӯйи дақиқан муайян кардани ҳаҷми зарар кор мекунад.

«Тибқи маълумоти пешакӣ, ҳудуди 22 метри мураббаъи шишаи тирезаҳои қатора осеб дида, аз ин рӯ, маблағи зиён ночиз аст ва худи корхона онҳоро бартараф намуда, ҷониби Русия уҳдадор аст, ки маблаги зарарро рӯйпӯш намояд», - гуфтанд дар корхона.

Дар шарҳи масъалаи мазкур аз корхона иттилоъ доданд, ки тартиби ҷуброни зарар тибқи асноди танзимкунандаи Шӯро оид ба нақлиёти роҳи оҳани кишварҳои узви ИДМ ва кишварҳои Балтика амалӣ мегардад, ки дар он гуфта мешавад, ҳаҷми зиёнро кишваре пардохт мекунад, ки дар қаламрави он чунин ҳодисаҳо рух медиҳанд.

Дар ҳамин ҳол, 8 вагони қатораи Тоҷикистон, ки рӯзи 10-уми октябр дар қитъаи роҳи оҳани ноҳияи Ғаллаарали вилояти Ҷиззахи кишвари ҳамсояи Ӯзбекистон бар асари корҳои таъмир дар ин қитъа ба садама дучор гардида буданд, таъмир ва ба Тоҷикистон баргардонида шуданд. «Ин вагонҳо аллакай мавриди истифода қарор дошта, мо дигар ба Ӯзбекистон ҳеҷ даъвое надорем», - гуфтанд дар КВД «Роҳи оҳани Тоҷикистон».