Отабек Мадраҳимов, шаҳрванди Тоҷикистон, ки дар шаҳри Маскави Русия ҳамчун муҳоҷири корӣ фаъолият доштааст, дар яке аз шоҳроҳҳои ин шаҳр сӯхтори мошинеро хомӯш кардааст. Ҳодиса ду рӯз пеш, 24-уми апрел рух додааст.

Дар навори аз ҷойи ҳодиса нашршуда дида мешавад, ки Отабек Мадраҳимов бо мошини обкаши худ дар миёни раҳ меистад ва оташи мошини алангагирифтаро хомӯш мекунад. Чанд қадам дуртар аз мошини оташгирифта кормандони хадамоти сӯхторхомӯшкунӣ ҳам ҳузур доранд ва барои оташхомӯшкунӣ омода мешаванд.

Намояндагии Вазорати меҳнат, муҳоҷират ва шуғли аҳолии Тоҷикистон дар Русия, ки бо ин ҷавони тоҷик сӯҳбат кардааст, менависад, ки Отабек Мадраҳимов корманди хоҷагии комуналии ноҳиявии “Хорошёво Мневники” буда, муваққатан дар шаҳри Маскав фаъолият менамояд.

Ин ниҳод бо истинод ба нақли Отабек Мадраҳимов навиштааст, ки ӯ “бо гумони он, ки дар дохили нақлиёт эҳтимол одамон қарор доранд, новобаста аз он, ки хатари ба амал омадани таркиш вуҷуд дошт, ҷасорат нишон дода, фидокорона оташро хомӯш намуд”.

Худи Отабек Мадраҳимов гуфтааст, ки “қарзи шаҳрвандии худро ба ҷо овардам. Гумон кардам, ки дар дохили нақлиёт касе ҳаст. Мо тоҷикон ҳамеша дар ҳолатҳои ногувор ба ҳама дасти ёрӣ дароз мекунем”.

Намояндагӣ ба Отабек Мадраҳимов барои ҷасорату матонаташ изҳори миннатдорӣ намуда, рафтори ҷавонмардонаи ӯро намунаи олии ибрат номидааст.

Аммо дар бораи ин қаҳрамонии шаҳрванди Тоҷикистон расонаҳои Русия хабар надодаанд.

Бояд гуфт, расонаҳои Русия, ки бештар ба таблиғот пардохтаанд, дар аксар ҳолат аз кӯчактарин қоидавайронкунии шаҳрвандини Тоҷикистон ва дар умум, кишварҳои Осиёи Марказӣ бидуни риояи меъёрҳои рӯзноманигорӣ, аз ҷумла риояи тавозун ва асли бароат иттилоъ медиҳанд, аммо аз инъикоси рафтори хуби онҳо худдорӣ менамоянд.

Дар Telegram, Facebook ва Instagram бо мо бимонед.