Додгоҳи иқтисодии Вилояти Мухтори Куҳистони Бадахшон (ВМКБ) талаби Додситонии ин вилоят дар бораи бозпас гирифтани замини Донишгоҳи Осиёи Марказӣ дар шаҳри Хоруғро қонеъ кардааст. Масъулини донишгоҳ аз болои ҳалнома шикояти кассатсионӣ кардаанд ва он дар баррасӣ қарор дорад.
Дар ин бора Рустам Мирзозода, раиси Додгоҳи олии иқтисодии Тоҷикистон имрӯз, 7-уми август, дар нишасти матбуотӣ хабар дод.
Номбурда гуфт, сабаби асосии бозпас гирифтани замини донишгоҳ риоя нашудани моддаи 25 Кодекси замини Тоҷикистон дар бораи ба муҳлати муайян, яъне то 50 сол ба иҷора додани замин ба шахсони хориҷӣ аст.
Дар моддаи 25 Кодекси замин омадааст, ки “қитъаҳои заминро ба шаҳрвандони хориҷӣ ва шахсони ҳуқуқии хориҷӣ ба истифодаи мӯҳлатнок ба мӯҳлати то 50 сол додан мумкин аст”.
"Мутаассифона, дар вақти додани қарори истифодаи замини донишгоҳ ба шаҳрвандони хориҷӣ ҳамин меъёри қонун риоя нашудааст. Айни ҳол ҳалномаи зинаи аввал қабул шудааст ва масъулини донишгоҳ ба марҳалаи дигар шикояти кассатсионӣ карданд ва он мавриди омӯзишу баррасӣ қарор дорад”, - гуфт Рустам Мирзозода.
Аммо зикр нагардид, ки меъёри қонун мушаххасан чӣ гуна вайрон карда шудааст. Оё замин ба муҳлати бештар ё камтар аз 50 сол ба иҷора дода шудааст ё муҳлати иҷора умуман муайян нашудааст?
Қаблан Додгоҳи олии иқтисодии Тоҷикистон хабар дода буд, ки Додситонии ВМКБ аз онҳо тақозо кардааст, то сертификати ҳуқуқи истифодаи замини Донишгоҳи Осиёи Миёна беэътибор дониста шуда, замин ба ҳукумати шаҳри Хоруғ баргардонда шавад.
Замини Донишгоҳи Осиёи Марказӣ дар шаҳри Хоруғ охири солҳои 90-ум аз сӯи Шабакаи Оқохон харидорӣ шуда, соли 2000-ум донишгоҳ таъсис ёфт.
Гуфта мешавад, ки зери созишномаи таъсиси ин донишгоҳ президентҳои Тоҷикистон, Қирғизистон ва Қазоқистон ва Шоҳзода Карим Оқохони 4 имзо кардаанд. Ин созишнома аз ҷониби порлумонҳои ин се кишвар ба тасвиб расид ва дар Созмони Милали Муттаҳид ҳам ба қайд гирифта шудааст.
Радиои Озодӣ менависад, ки Донишгоҳи Осиёи Марказӣ ягона муасисаи Шабакаи Оқохон нест, ки мақомоти Тоҷикистон мехоҳанд моликияташро давлатӣ кунанд. Моҳи гузашта Литсейи Оқохон дар шаҳри Хоруғ давлатӣ шуд. Пеш аз он меҳмонхонаи “Серена”, вобаста ба Шабакаи Оқохон (AKFED), дар маҳаллаи Теми шаҳри Хоруғ ҳам ба фоидаи давлат гузаронда шуд.
Соли гузашта Боғи марказии фароғатии шаҳри Хоруғро, ки зери сарпарастии Бунёди Оқохон буд, ба моликияти давлатӣ табдил доданд.
Ин созмони зери назари Оқохон то кунун дар бораи ин амалкарди мақомот ва давлатӣ шудани амволҳои зерсохторҳояш расман чизе нагуфтааст.
Дар Осиёи Марказӣ нисбат ба соли гузашта захираи об бештар шудааст
Размикори 5-уми тоҷик дар UFC: ӯ кист ва кай қарордод ба имзо мерасонад?
Шикояти 1200 муҳоҷири тоҷик оид ба нақзи ҳуқуқашон дар Русия ба сафорати Тоҷикистон
Дар баъзе кишварҳо дар робита ба ҳалокати президенти Эрон мотам эълон шуд
Чаро дар Тоҷикистон гӯшт ҳамеша қимат аст?
Аз “Лоиқхонӣ” то “Рӯзи шеъри тоҷик”. Дар Душанбе аз Муъмин Қаноат ва Лоиқ Шералӣ ёд карданд
Тоҷикистону Қирғизистон амният дар марзро баррасӣ карданд
Иҷрокунандаи вазифаи раиси ҷумҳур ва вазири умури хориҷаи Эрон муайян шуд
Русия дар Тоҷикистон истеҳсоли дорувориро ба роҳ монданист
Арзиши эстакада дар Душанбе қариб ба 28,5 млн евро баробар аст
Кулли ахбор
Авторизуйтесь, пожалуйста