То 1-уми сентябри соли ҷорӣ, дар рӯйхати "сиёҳ" ё шахсони таҳти назорати Вазорати корҳои дохилии Русия 770 ҳазор муҳоҷир қарор доранд, ки сеяки онҳоро занону кӯдакон мебошанд. Дар ин бора сомонаи Думаи давлатии Русия бо истинод ба Вячеслав Володин, раиси палатаи поёнии парлумони ин кишвар хабар медиҳад.
“Нисбат ба онҳо акнун реҷаи нави муҳоҷират - реҷаи ихроҷ амал мекунад”, - гуфтааст Володин.
Ӯ илова кардааст, ки дар 8 моҳи соли ҷорӣ, аз ҷониби Хадамоти федералии иҷрочиёни Русия ҳудуди 35 ҳазор хориҷӣ, ки қонунгузории муҳоҷирати ин кишварро риоя накардаанд, аз қаламрави кишвар хориҷ карда шудаанд.
Вячеслав Володин хотиррасон кардааст, ки 10-уми сентябр муҳлати будубоши шаҳрвандони хориҷӣ, ки маълумот дар бораи онҳо дар рӯйхати "сиёҳ" ё шахсони таҳти назорат - пойгоҳи маълумот дар бораи муҳоҷироне, ки ғайриқонунӣ дар қаламрави Русия ҳузур доранд, дохил шудааст, ба охир расид.
Аз 5-уми феврали соли 2025 дар Русия ба рӯйхати махсус шомил кардани хориҷиёне, ки ба нақзи қоидаҳои муҳоҷират даст задаанд, оғоз шуд.
Ба гуфтаи Володин ба ин рӯйхат шахсоне шомил мешаванд, ки барои анҷоми расмиёти дарёфти шаҳрвандӣ ё мақоми муҳоҷират ҳуҷҷатҳои зарурӣ пешниҳод накардаанд, дар ҷойи зисташон ё будубош ба қайд гузошта нашудаанд, муҳлатҳои анҷоми расмиёти ҳатмӣ аз қабили ҳар сол гузаштан аз муоинаи тиббӣ, пешниҳоди изи ангуштон ва суратро риоя накардаанд.
Ҳамчунин муҳоҷироне, ки муҳлати амали патент, иҷзоатнома барои кор ё шартномаи меҳнатиашон гузаштааст, низ ба ин рӯйхат дохил карда мешаванд.
Дар реҷаи ҷоригардида тақвияти назорат ва маҳдуд шудани як қатор ҳуқуқҳо пешбинӣ шудааст. Шахсоне, ки ба ин рӯйхат шомил шудаанд, наметавонанд шаҳодатномаи ронандагӣ гиранд, мошинро идора кунанд, ба хариду фурӯши амволи ғайриманқул ё воситаи нақлиёт машғул шаванд, издивоҷ кунанд, суратҳисоби бонкӣ кушоянд ва маблағҳои худро ихтиёрдорӣ намоянд.
“Ҳамаи он касоне, ки мақоми будубоши худро дар Русия қонунӣ накардаанд, бо хабар додани сана, макон ва хатсайри сафар бояд қаламрави кишвари моро тарк кунанд. Дар акси ҳол, муҳоҷир метавонад маҷбурӣ ва пардохти ҷарима ихроҷ шавад. Пас аз ин дар муддати ҳадди ақалл 5 сол вуруд ба Русия барои ӯ манъ мешавад”, - шарҳ додааст раиси Думаи давлатии Русия.
Ӯ ҳамчунин изҳор доштааст, ки низоми таъсисёфта ҷиҳати ба тартиб даровардани ҷараёни муҳоҷират ва таъмини риояи қонунгузорӣ аз ҷониби шаҳрвандони хориҷӣ мусоидат мекунад.
Руcский