Дар 9 моҳи соли равон 1600 кас, ки номашон дар рӯйхати қарздорони Хадамоти иҷро буд, натавонистаанд, кишварро тарк кунанд. Маҳз маҳдудияти сафар онҳоро маҷбур кардааст, ки садҳо миллион қарзи худро ба буҷети кишвар пардохт кунанд.

Дар ин бора Хадамоти иҷро хабар дода гуфтааст, ки “дар маҷмуъ, 1600 қарздор сарҳади кишварро убур карда натавониста, беш аз 24,7 млин сомонӣ, зиёда аз 108 ҳазор доллар ва 1 736 рубли белорусии худро пардохт кардаанд. Ин маблағҳо нисбат ба ҳамин давраи соли гузашта аз ҳисоби шумора 260 нафар зиёд ва аз ҳисоби маблағ 9 миллиону 651 ҳазору 168 сомонӣ, 91 ҳазору 868 доллар ва 1 736 рубли белорус зиёд мебошад”.

Манбаъ мегӯяд, дар 9 моҳ, ба Феҳристи ягонаи давлатии қарздорон номи 2350 кас  ва 13 корхонаву ташкилот ворид карда шудааст, ки нисбат ба ҳамин давраи соли гузашта 1062 адад зиёд мебошад.

“Ҳамзамон, нисбати 5075 қарздор маҳдудият гузошта шудааст, ки нисбат ба ҳамин давраи соли гузашта 2 123 нафар зиёд мебошанд. Дар умум, аз солҳои гузашта то ин давра нисбати зиёда 21 000 нафар қарздорон маҳдудият татбиқ гардидааст”, - гуфтанд аз ин ниҳод.

Ба ин феҳрист қарздороне дохил мешаванд, ки тибқи қарорҳои додгоҳ бояд маблағи қарзро пардохт кунанд.  Ҳадафи он ба таври иҷборӣ ситонидани қарзҳое аст, ки тибқи санади судӣ шахсони воқеқӣ ва ҳуқуқӣ муваззаф шудаанд.

 

Қариб 150 млн сомонӣ пардохти алимент

Ин ниҳод гуфтааст, ки дар ин давра ба манфиати модару кӯдак 149 млн 820 ҳазору 621 сомонӣ алимент ситонида шудааст, ки назар ба ҳамин давраи соли гузашта 126 млн 568 ҳазору 673 сомонӣ зиёд мебошад.

Акси марбут
Акс аз adolat.uz

Қаблан, Аҳтам Абдуллозода, сардори Хадамоти иҷрои Тоҷикистон дар нишасти матбуотӣ гуфта буд, ки дар 6 моҳ беш аз 57 млн 329 ҳазор сомонӣ алимент ба модару кӯдак пардохт шудааст, ки нисбат ба 6 моҳи соли гузашта қариб 36 млн сомонӣ зиёд мебошад.

“Агар алимент супорандагон дар муддати ду моҳ маблағи алиментро пардохт накунанд ба феҳристи қарздорон дохил шуда, маҳдудиятҳои убури сарҳад барои онҳо низ ҷорӣ карда мешавад” – таъкид кард ӯ.

Ёдовар мешавем, ки мушкили саркашӣ аз пардохти алимент нав набуда, солҳои қабл низ мақомот ҷой доштани онро зикр мекарданд. Солҳои охир манъи хуруҷи нафарони саркаш аз пардохти алиментро ҳамчун яке аз роҳҳои ҳалли ин масъала муаррифӣ мекунанд.

Дар Telegram, Facebook ва Instagram бо мо бимонед.