Душанбе. 6-уми август. ОИ «Азия-Плюс» - Айни замон президенти Тоҷикистон Эмомалӣ Раҳмон бо намояндагони Хазинаи байнулмилалии асъор (ХБА) мулоқот мекунад.

Дар мулоқот масоили ҳамкории дуҷонибаи ин созмони молиявӣ ва Тоҷикистон ҷиҳати ҷалби сармоягузорӣ ба иқтисоди ҷумҳурӣ мавриди баррасӣ қарор гирифтаанд.

Аз эҳтимол дур нест, ки дар вохӯри ҳамчунин масъалаи баргузории мониторинги фаъолияти Бонки миллии Тоҷикистон, ширкати саҳомии холдинги кушодаи «Барқи тоҷик» ва ширкати алюминии Тоҷикистон «Талко» низ муҳокима шавад. Таври маълум, ХБА шаффофияти фаъолияти онҳоро талаб карда буд.

Ҳайати ХБА-ро сармушовири Департаменти ХБА оид ба Шарқи Наздик ва Осиёи Марказӣ Дэвид Оуэн, ки ба шарҳи фаъолият дар Осиёи Марказӣ ва Қафқоз масъул аст, роҳбарӣ мекунад.

Ҳайати ХБА бо сафари расмӣ барои натиҷагирӣ аз вазъи макроиқтисодӣ ва пешравии марҳилаи аввали Барномаи Мониторинги Хазина ( SMP ), ки нимсолаи дуввуми соли ҷориро дар бар мегирад, дар Тоҷикистон қарор доранд.