Вазири мудофиаи Тоҷикистон генерал-полковник Шералӣ Хайруллоев ҷиҳати иштирок дар машварати навбатии вазирони мудофиаи кишварҳои узви Созмони ҳамкории Шанхай (СҲШ), ки пагоҳ, 26-уми июн доир мегардад, ба пойтахти Қирғизистон – шаҳри Бишкек раҳсипор шуд. Дар ин бора ба ОИ «Азия-Плюс» котиби матбуоти Вазорати мудофиаи ҶТ Фаридун Маҳмадалиев хабар дод.

Ба гуфтаи ӯ, дар ҷараёни сафари Шералӣ Хайруллоев ба Бишкек ҳамчунин баргузории як қатор мулоқоту гуфтушунидҳои дуҷониба низ дар назар аст.

Бино ба маълумоти ВАО-и Қирғизистон, дар машварат вазирони мудофиаи Қазоқистон – Адилбек Ҷаксибеков, Чин – Чан Вансюан, Русия – Сергей Шойгу, Тоҷикистон – Шералӣ Хайруллоев ва муовини аввали вазири мудофиаи Ӯзбекистон – Шавкат Норматов ширкат меварзанд.

Гуфта мешавад, дар чорабинии мазкур дабири кулли Созмони ҳамкории Шанхай Дмитрий Мезенсев ва мудири Кумитаи иҷроияи сохтори минтақавии зидиитерррористии СҲШ Чжан Синфен низ иштирок хоҳанд кард.