Раҳбарияти Қирғизистон як ҳайати ҳукуматиашро ҷиҳати дарёфт ва омӯзиши асноди иловагии таърихӣ ба Русия сафарбар карданист, то ки ба ҷониби Қирғизистон дар масъалаи таъйин ва аломатгузорӣ дар марз бо Тоҷикистон кумак расонида тавонанд.

Бино ба иттилои «Вечерний Бишкек» зимни як мизи гирд оид ба ин мавзӯъ намояндаи махсуси дастгоҳи ҳукумати Қирғизистон оид ба масъалаи аломатгузорӣ дар марз миёни Тоҷикистону Қирғизистон Қурбонбой Искандаров изҳор намудааст, ки айни замон танҳо 590 километри марзи кишварҳо аломатгузорӣ шудаанд.

«Ҷонибҳо оид ба дарёфт ва омӯзиши ҳуҷҷатҳои иловагӣ оид ба ин масъала тавофуқ ҳосил намуданд. Барои ҷустуҷӯи асноди таърихӣ дар ин мавзӯъ мо ҳайатамонро ба Русия фиристоданием. Ҳайати Тоҷикистон бо ин мақсад аллакай аз Русия боздид намуд», - иброз доштааст ӯ.

Қ.Искандаров бар ин назар аст, ки «гуфтушунидҳо бо ҳамсоякишвар оид ба масоили марзиро мебояд бо муқаррар кардани асосҳои ҳуқуқӣ барқарор намуд». «Ба сифати асоси ҳуқуқии муайян кардани хатти марзи давлатӣ Қирғизистон маводи солҳои 1955-1959-умро пешниҳод мекунад, вале Тоҷикистон дар мавқеъи худ истодагарӣ намуда, дар ин масъала маводи ҷудошавии марзҳо дар соли 1927-ро асос медонад, аз ин рӯ, то ҳанӯз мо ба таҳияи санади муштарак дар ин хусус ноил нагардидаем», - қайд кардааст ӯ.

Қобили зикр аст, ки масофаи марзи давлатӣ миёни Тоҷикистону Қирғизистон 970,8 километрро ташкил медиҳад.