Марзи Тоҷикистон ва Қирғизистон, ки қариб 4 сол ба ин сӯ баста буд, интизор меравад пагоҳ, 13-уми марти соли 2025, боз шавад. Дар ин бора як манбаъ ба “Азия-Плюс” аз ҳукумати вилояти Суғд хабар дод.

Ӯ гуфт, “ифтитоҳи расмии гузаргоҳҳои марзӣ аз ҳарду ҷониб бо ҳузури мақомоти баландпоя ва марзбонон сурат мегирад”.

Вале маълум нест, ки дар он раисони ҷумҳури ду кишвар ба таври маҷозӣ ё ҳузурӣ ширкат мекунанд. Ҳамчунин, номаълум аст, ки мушаххасан кадом гузаргоҳи сарҳадӣ боз мешавад.

Қаблан, як манбаи дигар аз ҳукумати Исфара ба “Азия-Плюс” гуфта буд, ки раисони ҷумҳури Тоҷикистон ва Қирғизистон ба таври маҷозӣ дар кушодашавии ду гузаргоҳи марзӣ байни ду кишвар ширкат мекунанд.

Бояд гуфт, ки имрӯз, 12-уми март, Эмомалӣ Раҳмон, раиси ҷумҳури Тоҷикистон, бо як сафари давлатӣ ба Қирғизистон рафт ва ин сафар ду рӯз идома меёбад.

Дар ҳамин ҳол, пагоҳ, 13-уми март, як гурӯҳ рӯзноманигорон барои инъикоси кушодашавии марз байни ду кишвар ба минтақаҳои марзӣ даъват шудаанд. Яке аз хабарнигорони даъватшуда низ тасдиқ кард, ки пагоҳ ба сарҳади Тоҷикистону Қирғизистон меравад ва тибқи иттилои ба ӯ ироашуда, дар маросими дубора боз шудани сарҳади давлатии ду кишвар иштирок карда, онро пӯшиш медиҳад.

Ёдовар мешавем,ки марзи Тоҷикистону Қирғизистон баъди даргирии марзии моҳи апрел-майи соли 2021 баста шуда буд. Он замон Қирғизистон сарҳадро якҷониба баст.

Дар Telegram, Facebook ва Instagram бо мо бимонед.