Шаби 22 ба 23-юми феврал имдодгарони Кумитаи ҳолатҳои фавқулодаи Тоҷикистон, ки дар амалиёти ҷустуҷӯӣ дар манотиқи осебдидаи Туркия ширкат доштанд, ба ватан бармегарданд.

“Соати 1-и шаби 23 феврал нишасти ҳавопаймо бо наҷотдиҳандагони тоҷик дар Душанбе дар назар аст. Ҳамаи ҳайати гурӯҳ ба ватан бармегарданд”, - хабар дод ба “Азия-Плюс” роҳбари маркази матбуоти КҲФ Умеда Юсуфӣ.

Ёдрас мекунем, ки ба ҳайати гурӯҳе, ки дар корҳои ҷустуҷӯ ва наҷот дар минтақаҳои аз заминларза осебдидаи Туркия иштирок кард, 50 нафар имдодгарону табибон шомил буданд.

“Имдодгарони мо вазифаи худро муваффақона иҷро карда, дар корҳои ҷустуҷӯ ва наҷот дар вилоятҳои Қаҳрамонмаръаш ва Хатойи Туркия саҳм гузоштанд”, - хабар доданд дар Кумита.

Сурат: КҲФ Тоҷикистон

Қобили зикр аст, ки гурӯҳи имдодагрон ва табибони КҲФ Тоҷикистон 9 феврал ба Туркия раҳсипор шуданд. Корҳои ҷустуҷӯро онҳо дар Қаҳрамонмаръаш, ки бештар осеб дида буд, оғоз намуда, сипас онҳоро ба қитъаи дигар - Хатой сафарбар намуданд.

Дар маҷмӯъ, имдодгарони тоҷик дар ҷараёни кори худ 3 нафарро зинда ва беш аз 200 ҷасадро аз зери харобаҳо берун оварданд.

Президенти Туркия Раҷаб Тайип Эрдуғон ва вазир мудофиаи миллии ин кишвар Хулуси Аскар ба имдодгарон тоҷик изҳори миннатдорӣ карданд.

Дар Telegram, Facebook, Instagram, OK ва ВК бо мо бимонед.