Имрӯз дар “Ҳумо Арена”-и пойтахти Ӯзбекистон - шаҳри Тошканд маросими ифтитоҳи Чемпионати XXII ҷаҳон оид бокс байни мардон доир гардид, хабар дода мешавад дар торнамои расмии Ассотсиатсияи байнулмилалии бокс (IBA).
Дар маросими ифтитоҳ сарвазири Ӯзбекистон Абдулло Орипов, вазири сиёсати ҷавонон ва варзиши ин кишвар Адҳам Икромов, котиби генералии Кумитаи миллии олимпии кишвари ҳамсоя Айбек Қосимов, инчунин президенти IBA Умар Кремлев ҳузур доштанд.
Рақбатҳо шоми имрӯз оғоз гардида, то 14 май идома меёбанд.
Тоҷикистонро дар ин чемпионат 13 нафар варзишгарон намояндагӣ мекунанд.
Имрӯз, 1 май барои дарёфти медалҳо муштзанон дар вазнҳои то 57, 60, 92 ва зиёда аз 92 кило ба рақобат мепардозанд.
Ба ҳайати мунтахаби Тоҷикистон дар ин чемпионат инҳо шомил шудаанд: Меҳрон Шафиев (до 48 кг), Меҳроб Ҳамидов (то 51 кг), Меҳроҷ Зоидов (то 54 кг), Асрор Воҳидов (то 57 кг), Абӯбакр Муродзода (то 60 кг), Баҳодур Усмонов (то 63,5 кг), Расул Аҳадов (то 67 кг), Довуд Маҳкамов (то 71 кг), Некрӯз Салимов (то 75 кг), Шаббос Неъматуллоев (то 80 кг), Парвиз Каримов (то 86 кг), Давлат Болтаев (то 92 кг), Муҳаммад Аброриддинов (зиёда аз 92 кг).
Ғолиби ҳар кадоме аз вазнҳо 200 ҳазор доллар, зинаи дуюм - 100 ҳазор доллар ва дорандагони медалҳои биринҷӣ - 50 ҳазор долларӣ мукофотпулӣ мегиранд.
Дар таърихи чемпионатҳои ҷаҳон Тоҷикистон ҳамагӣ се медали биринҷӣ ба даст овардааст. Ба дарёфти онҳо Абдусалом Ҳасанов (вазни то 57 кг) соли 2003 дар Таиланд, Шералӣ Достиев (то 48 кг) соли 2005 дар Чин ва Анвар Юнусов (то 56 кг) соли 2011 дар Озарбойҷон ноил гардидаанд.
Чемпионати ҷаҳон оид ба бокс IBA бори нахуст дар Ӯзбекистон ва маротибаи дуюм -дар Осиёи Марказӣ баргузор мешавад. Соли 2013 ин мусобиқотро шаҳри Алматои Қазоқистон қабул карда буд.
Дар ҳамин ҳол, федератсияҳои як қатор кишварҳо аз иштирок дар мусобиқа даст кашиданд. Сабаби таҳрим дар он аст, ки IBA ба варзишгарон аз Русия ва Беларус барои истифода аз рамзҳои кишварашон иҷоза дод, ки мухолифи мавқеи Кумитаи байнулмилалии олимпӣ (КБО) аст.
Қобили зикр аст, ки ихтилоф миёни КБО ва IBA ба он оварда расонид, ки навъи варзиши бокс ба барномаи пешакии Бозиҳои олимпии соли 2028 дохил нашуд.
Руcский