Душанбе. 8-уми апрел. ОИ «Азия-Плюс» - Бо қарори раиси шаҳри Душанбе Маҳмадсаид Убайдуллоев, дар доираи чорабиниҳои таҷлили ҷашни Рӯзи пойтахт, ки 18-уми апрел доир мегардад, дар пойтахт марафони варзишгарон баргузор мешавад.

            Чӣ тавре ки сухангӯи раиси пойтахт Шавкат Саидов ба ОИ «Азия-Плюс» хабар дод, марафон аз соати 8 то 11 аз хиёбони Ҳофизи Шерозӣ оғоз гардида, то посгоҳи БДА-и «Чорбоғ»-и ноҳияи Варзоб идома меёбад ва сипас аз он ҷо варзишгарон боз то ҷойи аввала бармегарданд. «Баҳри ҳавасмандии иштирокчиён аз ҳисоби воситаҳои озоди буҷаи шаҳр 24 ҳазор сомонӣ маблағ ҷудо гардида, ғолиби марафон бо 5 ҳазор ва ҷойҳои дуввуму саввум мутаносибан бо 4 ва 3 ҳазор сомонӣ мукофотпулӣ қадронӣ хоҳанд шуд», - гуфт ӯ.

            Ба гуфтаи Ш.Саидов, барои иштирок дар марафон донишҷӯёни макотиби олӣ ва намояндагони корхонаву муассисоти шаҳр даъват шудаанд. Варзишгарони аз синни 14-сола боло пеш аз марафон бояд аз ташхиси тиббӣ гузашта, ҳамчунин аз ҳакамони мусобиқа иҷозатнома гиранд. «Барои намояндагони манотиқи кишвар ҷиҳати иштирок дар марафон квотаҳо ҷудо шудаанд, ки он барои вилоятҳои Хатлону Суғд 10 нафарӣ, ВМКБ – 5 нафар ва ноҳияҳои тобеи марказ – 40 нафар варзишгар муқаррар шудааст», - афзуд Ш.Саидов.