Додгоҳи шаҳри Истаравшан дар пайи қазияи ҷанҷоли сокинони деҳаи Лакат бо милисаҳо 4 сокини ин деҳаро аз 2 солу 6 моҳ то 3 сол равонаи зиндон карда, ду нафари дигарро аз 6 моҳ то 1,5 сол шартан аз озодӣ маҳрум намудааст. Дар ин бора наздикони маҳкумшдагон хабар доданд. Мақомот дар ин бора хомуширо ихтиёр кардаанд.

Яке аз наздикони маҳкумшудаҳо дар суҳбат бо “Азия-Плюс” гуфт, ҳукми суд як моҳ қабл 7-уми сентябри соли равон содир шудааст.

Вале мақомот бо ҳар роҳ мехоҳанд, ҳукми додгоҳро пинҳон доранд. Аз ҷумла, кушишҳои мо барои дарёфти нусхаи ҳукми суд ва ё тасдиқи он аз мақомот, аз ҷумла Додгоҳи шаҳри Истаравшан ва Додгоҳи вилояти Суғд бенатиҷа анҷом ёфт.

Наздикони судшавандаҳо имрӯз, 4-уми октябр дар суҳбат бо “Азия-Плюс” гуфтанд, бар асоси ҳукми суд Ҷамолиддин Раҳматов 3 сол, Деҳқон Абдусамадов, Бурҳон Турдиев ва Талант Маҳмадқулов 2 солу 6 моҳи равонаи зиндон гардиданд.

“Инчунин, додари Ҷамолиддин  Раҳматов-Ғайрат Раҳматов бо пардохти ҷарима 1 солу 6 моҳ ва Исфандиёр Урунбоев 6 моҳ шартан аз озодӣ маҳрум шуданд”, - гуфт манбаи мо.

Ҳамсуҳбати мо, ҳаҷми пардохти ҷаримаи Раҳматовро нагуфт, вале афзуд, бо гузаштаи як моҳ аз судури ҳукми додгоҳ пайвандони маҳкумшудагон ба зинаҳои болоии додгоҳ, аз ҷумла кассатсионӣ шикоят набурдаанд.

Ҳамин тариқ, мавқеи судшавандаҳо ва наздикони онҳо дар робита ба ҳукми догоҳ маълум нест.

Қаблан, дар пайи ин қазия мақомот аз боздошти панҷ нафар хабар дода буданд.

Ёдовар мешавем, ки ҳодисаи муноқишаи сокинони деҳаи Лакати шаҳри Истаравшан бо милисаҳо охири моҳи май рух дод. Сабаби ҳодиса гуногун шарҳ дода мешавад.

Нахуст, Раёсати ВКД дар вилояти Суғд бо нашри наворе гуфта буд, ки сокинони деҳаи Лакати шаҳри Истаравшан кормандони милисаро ҳангоми “таҳқиқи як хабари оперативӣ” латукӯб кардаанд. Дертар  навор аз сомона пок шуд.

Тибқи иттилои Раёсати ВКД дар вилояти Суғд, дар пайи ин ҳодиса  нисбати 9 нафар бо се модда, аз ҷумла авбошӣ ва “истифодаи зӯроварӣ ба муқобили намояндаи ҳокимият” парвандаи ҷиноятӣ боз шуда, ҳамчунин алайҳи 18 сокини дигари шаҳри Истаравшан бо иттиҳоми майдаавбошӣ парвандаи маъмурӣ тартиб дода шудааст.

Баъдан, 3-юми август, Адҳам Маъмурзода, раиси шаҳри Истаравшан ҳодисаи мазкурро шарҳ дода, гуфта буд, ки сабаби асосии он, маъракаи даъват ба артиш буд.

Пайвандони сокинони боздоштшуда ҳодисаро ба таври дигар шарҳ медиҳанд ва мегӯянд, кормандони милитсия духтари ноболиғро ба мошини худ савор карда, ба саҳро бурдаанд ва нисбати ӯ рафтори ношоиста кардаанд. Пас аз фарёди духтар сокинони атроф ба назди мошин ҷамъ шуда, аз кормандони милитсия шарҳи ҳодисаро талаб кардаанд ва қазия ба муноқиша печидааст.

Дар ҳамин ҳол, Руқия  Ниёзқулова, модари духтари ноболиғ мегӯяд, кормандони ҳукумат ва додситонии шаҳр ба ӯ барои суҳбат бо журналистон ва паҳн кардани навор аз ҷойи ҳодиса, фишор меоранд.

Дар ҳамин ҳол, Рамазон Раҳимзода, вазири корҳои дохилии Тоҷикистон  зимни нишасти матбуотии ахири худ, 14-уми август, сабаби муноқишаи мазкурро “монеагӣ эҷод кардан барои нигоҳ доштани тартиботи ҷамъиятӣ” номид.

Ҳамин тариқ, Фурқат Хоҷазода, додситони вилояти Суғд зимни нишасти матбуотӣ гуфт, духтари ноболиғе, ки гуфта мешавад, боиси муноқиша миёни кормандони милитсия ва сокинон дар деҳаи Лакати шаҳри Истаравшан шудааст, дар “амалиёт”-и ҷалби ҷавоне ба артиш иштирок доштааст. Кормандони оперативӣ мехостаанд тавассути он духтар, ҷавони аз хидмати ҳарбӣ саркашикардаро дастгир намоянд.

То ҳол назари ҷабрдидаҳо, аз ҷумла милисаҳо дар ин қазия маълум нест.

Дар Telegram, Facebook, Instagram, OK ва ВК бо мо бимонед.