Ба конфронси панҷуми ҳамкории иқтисодии минтақавӣ оид ба Афғонистон (RECCA-V), ки рӯзҳои 26-27-уми март дар шаҳри Душанбе доир мегардад, намояндагони 40 кишари ҷаҳон дар сатҳи вазирони корҳои хориҷӣ даъват шудаанд.

Бино ба маълумоти Кумитаи тадорукоти конфронс, ба рӯйхати даъватшудагон вазирони корҳои хориҷии кишварҳои Озарбойҷон, Австралия, Афғонистон, Белгия, Бразилия, Британияи Кабир, Олмон, Ҳолланд, Гурҷистон, Дания, Миср, Ҳиндустон, Индонезия, Иордания, Ироқ, Эрон, Ирландия, Қазоқистон, Канада, Қатар, Қирғизистон, Чин, Кореяи Шимолӣ, Қувайт, Малайзия, Норвегия, АМА, Уммон, Покистон, Русия, Арабистони Саудӣ, Сингапур, ИМА, Туркманистон, Туркия, Ӯзбекистон, Фаронса, Шветсия ва Ҷопон шомиланд.

Ғайр аз ин ба унвони 33 созмонҳои байнулмилаливу минтақавӣ ва ниҳодҳои молиявӣ, аз қабили Дабири кулли СММ, САҲА, роҳбарони Созмони ҷаҳонии савдо, Бонки осиёгии рушд, Хазинаи байнулмилалии асъор, Бонки ҷаҳонӣ, Бонки исломии рушд, ЮНЕСКО, Созмони ҳамкории Шанхай, Фонди байнулмилалии наҷоти баҳри Арал ва чанде дигарон даъватномаҳои расмӣ фиристода шудаанд.

«То ба имрӯз беш аз 50 нафар даъватшудагон иштироки худ дар кори конфронсро тасдиқ намуданд», - гуфтанд дар Кумитаи тадоруот, вале аз ифшои ному  мансаби онҳо худдорӣ варзиданд.

Дар ҳамин ҳол, бино ба маълумоти Вазорати корҳои хориҷии ҷумҳурӣ, қаблан иштирок дар кори конфронсро сарони кишварҳои Афғонистону Покистон Ҳомид Карзай ва Алӣ Осиф Зардорӣ тасдиқ карданд.

Дар ҷараёни кори конфронс як қатор лоиҳаҳо оид ба энергетика, саноат, сохтмони роҳҳо, омодасозии кадрҳо барои Афғонистон муаррифӣ хоҳанд шуд.