Чанде қабл дар ш. Люксембург вохӯрии Сафири Фавқулода ва Мухтори Ҷумҳурии Тоҷикистон дар Гертсогии Бузурги Люксембург (бо иқоматгоҳ дар ш. Брюссел) Рустамҷон Солиев бо Президенти Палатаи савдои Люксембург Пиер Грамегна баргузор гардид.

Тавре аз департаменти иттилооти Вазорати корҳои хориҷии ҷумҳурӣ хабар доданд, зимни мулоқот тарафҳо лоиҳаҳои аз ҷониби Тоҷикистон дар ҷараёни сафари расмии Президенти Ҷумҳурии Тоҷикистон Эмомалӣ Раҳмон ба Люксембург 9-10 июни соли 2011 пешниҳодгардидаро, ки Палатаи савдои Люксембург онҳоро амалӣ месозад, муҳокима намуданд. Ҳамзамон мусоҳибон роҳҳои мушаххаси густариши равобити миёни ду кишварро дар соҳаҳои иқтисодӣ, тиҷоратӣ ва сармоягузорӣ баррасӣ карданд.

Пиер Грамегна зикр сохт, ки лоиҳаҳои сармоягузории аз ҷониби Тоҷикистон манзургардида дар марҳилаи оғози татбиқи амалӣ қарор доранд. Тибқи гуфтаҳои ӯ, доираҳои молиявӣ ва соҳибкории Люксембург ба самтҳои коркарди маъдан, сохтмон ва коркарди маҳсулоти кишоварзӣ мароқи хоса зоҳир менамоянд. Пиер Грамегна афзуд, ки Палатаи савдои Люксембург дар асоси маводҳои иттилоотии аз ҷониби Сафорати Тоҷикистон пешниҳодгардида таҳлили дақиқи фазои сармоягузории ҷумҳуриро гузаронида, қарори тавсия додани рушди равобити дуҷонибаи иқтисодӣ, тиҷоратӣ ва сармоягузорӣ бо Тоҷикистонро ба тамоми ширкатҳо, доираҳои молиявӣ ва соҳибкории Люксембург қабул намуд.

Бо мақсади тезонидани амалигардонии лоиҳаҳои сармоягузорӣ ҷонибҳо тасмим гирифтанд, ки гурӯҳи сармоягузорон ва соҳибкорони Люксембургро ташкил дода, то охири соли равон ба Тоҷикистон сафарбар кунанд.