Дар Тоҷикистон аз 11 июл нишастҳои хабарии вазорату идораҳо ва корхонаву муассисаҳо оид ба ҷамъбасти нимсолаи аввал оғоз мегарданд, хабар медиҳад АМИТ “Ховар”.

Гуфта мешавад, нақшаи ташкил ва баргузории нишастҳои матбуотӣ аз ҷониби роҳбари дастгоҳи президенти Тоҷикистон рӯзи 28 июн тасдиқ шуд.

Дар ҷараёни нишастҳои матбуотӣ, ки ҳар рӯзи корӣ баъд аз 11 июл якчанд вазорату идораҳо мегузаронанд, намояндагони ВАО имкон пайдо мекунанд, ки ба саволҳои мавриди таваҷҷуҳашон посух гиранд.

Шахсони масъули вазорату идораҳо ва корхонаву муассисаҳои дар шаҳри Душанбе фаъолиятдошта бояд вақти баргузории нишастҳои матбуотиро бо АМИТ “Ховар” тариқи телефонҳои 238-52-23, 888-08-34-04 мувофиқа кунанд.

Мувофиқи ҷадвали тасдиқшуда нишастҳои матбуотии вазорату идораҳо ва корхонаву муассисаҳои ҷумҳурӣ 5 август ба итмом мерасанд.

Қобили зикр аст, ки тибқи супориши сарвари давлат аз 4-уми марти соли 2005, бо мақсади таъмини шаффофияти фаъолияти вазорату идораҳо ва ҳамчунин дастрасии матбуот ба сарчашмаҳои расмии маълумот нишастҳои хабарӣ дар ҳар семоҳа гузаронида мешуданд.

Аммо баъдан ба супориши мазкур тағйирот ворид гардида, шурӯъ аз 1-уми октябри соли 2011 нишастҳои хабарии ҳатмии мақомоти давлатӣ дар ним сол як маротиба баргузор мешаванд.

Дар супориши мазкур зикр шудааст, ки дар сурати зарурат роҳбарони вазорату идораҳо метавонанд дар як моҳ якчанд маротиба нишасти хабарӣ баргузор кунанд.

Дар Telegram, Facebook, Instagram, OK ва ВК бо мо бимонед.