Вазорати корҳои дохилии Тоҷикистон вохӯрии намояндагони ВАО ва ҷавонон бо шаҳрванди Тоҷикистонро, ки аз Сурия баргаштааст, барпо намуд. Вохӯри дар маҷмааи «Кохи Ҷомӣ» ташкил гардид.

Фаррух Шарипови 25-сола, зодаи шаҳри Хуҷанди вилояти Суғд рӯзи 6 май аз Сурия тариқи Туркия омадааст. Ӯ дар бораи чӣ гуна ба даргириҳои Сурия ҷалб шуданаш аз ҷониби як духтари рус тавассути шабакаи иҷтимоӣ ҳикоят карда, изҳор намуд, ки баъди аз ҳамсараш ҷудо шудан ва бо ин сабаб дар ҳолати нохуби равонӣ қарор доштан, дар «Одноклассники» бо духтари рус шинос шуда, ин духтар ӯро ба ҷанг ҷалб мекунад ва сипас тариқи Маскаву Туркия ӯро ба Сурия мефиристанд.

Ба гуфтаи Фаррух Шарифов, шиносномаи ӯ дар Туркия нобуд шудааст. Ӯ ба журналистон ва ҷавонони ҳузурдошта ҳикоят кард, ки барои дубора ба Тоҷикистон баргаштан мушкилиҳои зиёдеро паси сар кардааст.

Шарифов қайд кард, ки дарҳол пас аз ба Сурия расидан дарк кардааст, ки ӯро фиреб додаанд. «Он ҷо ҳама як фикри чӣ гуна ба ватан баргаштанро доранд, аммо аз изҳори он метарсанд, зеро агар сухане дар бораи бозгашт ба хона бигӯянд, онҳоро ҳукми қатл интизор аст», - иброз дошт номбурда.

Ёдрас мекунем, ки Фаррух Шарифов аллакай панҷум тоҷикистониест, ки ихтиёрӣ аз Сурия ба ватан баргашт.

Қобили зикр аст, ки вохӯрии журналистон ва ҷавонон бо Фаррух Шарифови ихтиёрӣ аз ҷанги Сурия баргашта вохӯрии нахустинест, ки ВКД барпо кард.