Қӯрғонтеппа. 7-уми июн.  «Азия-Плюс» — | Суди шаҳри Қӯрғонтеппа ду занро, ки ба таълимоти ғайриқонунии динӣ машғул буданд, ба ҷавобгарии маъмурӣ кашид.

Бино ба гуфти Ҳасан Мӯъминов, судяи суди шаҳри Қӯрғонтеппа, Зӯҳро Муҳаммадҷонова ва Мавлуда  Мавлонова бо моддаи 474-и Кодекси ҳуқуқвайронкунии маъмурӣ, яъне  риоя накардани қонунгузорӣ дар бораи ташкилотхои динӣ гунаҳкор дониста шуда, онҳо ба миқдори 10  нишондиҳанда барои ҳисоб (1 нишондиҳанда ба 35 сомонӣ баробар аст) ҷаримабандӣ шуданд.

Ба қавли судя, онҳо дар манзилҳои истиқоматии худ бидуни иҷозати мақомоти дахлдори давлатӣ аз 7 то 10 нафар духтаронро ба таълим додани дини ислом фаро гирифта будаанд. «Ҳамчунин боз як парвандаи ҳуқуқвайронкунии маъмурӣ нисбати як зани дигар, ки ӯ низ бидуни иҷозатнома ба таълими динӣ машғул будааст, мавриди баррасии суд қарор дорад», - афзуд Ҳ.Мӯъминов.

Бино ба маълумоти мақомоти ҳифзи ҳуқуқ, соли равон дар вилояти Хатлон 39 далели роҳандозии таълими ғайриконунии динӣ ба наврасон дар манзилҳои истиқоматӣ ошкор шудааст.