Барои таъсиси телевизиони хусусӣ дар пойтахти Тоҷикистон як нафар муроҷиат кардааст, аммо пас аз шиносоӣ бо бастаи ҳуҷҷатҳои дархостшаванда, “барои фикр кардан” рафтааст. Дар ин бора Нуриддин Саид, раиси Кумитаи телевизион ва радиои назди Ҳукумати Ҷумҳурии Тоҷикистон зимни нишасти матбуотӣ имрӯз, 8-уми феврал, хабар дод.

Нуриддин Саид гуфт, барои таъсиси телевизиони хусусӣ бо дархосткунанда шахсан сӯҳбати рӯ ба рӯ анҷом додааст ва феҳристи ҳуҷҷатҳоеро, ки тибқи муқаррароти қонунгузории Тоҷикистон пешбинӣ мешавад, ба вай пешниҳод намудааст.

Раиси Кумитаи телевизион ва радио аз нафари дархосткунанда ном набурд, вале гуфт, ки “аз он шахс хоҳиш кардам, ки ҳаракат кунед, фарогирии телевизиони таъсисмедодаи шумо ҳам дар Душанбе ва ҳам дар ҳудудҳои сарҳадии Тоҷикистон бошад”.

“Мо минтақаҳое дорем, ки воқеан ба телевизиони бо забони давлатӣ фаъолият мекарда эҳтиёҷ доранд. Бисёр хурсанд шудам аз ин пешниҳод. Он кас ҳоло рафтанд, ки фикр кунанд. Баргашта, ки омаданд, “ҳа” ё “не”-ашонро мегӯянд”, - гуфт Нуриддин Саид.

Бояд гуфт, ки айни ҳол дар Тоҷикистон 14 телевизиони давлатӣ ва 18 телевизиони хусусӣ дар манотиқи гуногун кишвар фаъолият мебаранд, аз ҷумла дар пойтахти кишвар низ телевизиони хусусии СМТ фаъол аст, аммо ягон телевизиони хусусии умумимиллӣ нест.

Дар Telegram, Facebook, Instagram, OK ва ВК бо мо бимонед.