Бар асари даргирии мусаллаҳона миёни нерӯҳои ҳарбии Озарбойҷон ва Арманистон, ки шаби 12-ум ба 13-уми сентябр оғоз шуд, наздики 100 нафар ҷон доданд.

Вазорати мудофиаи Озарбойҷон дар телеграм канали худ навишт, ки дар ҷараёни даргириҳо бо нерӯҳои арманитабор дар рӯзи гузашта 50 сарбозашро талаф додааст.

Қаблан президенти Арманистон зимни суханронии худ дар парлумони кишвараш аз кушта шудани 49 сарбози арманӣ иттилоъ дода буд.

Даргириҳои мусаллаҳона шаби 12-ум ба 13-уми сентябр оғоз гардида, ҷонибҳо ҳамдигарро барои вайрон кардани созиши оташбас ва иғвоангезӣ муттаҳам мекунанд.

Дар пайи оғози низои нав Арманистон ба Русия ва СААД (ОДКБ), ки Тоҷикистон низ аъзои он аст, муроҷиат карда, хостори кӯмак шуд. Русия аз ҳар ду ҷониб даъват кард, ки ба созиш оянд ва ихтилофро тариқи дипломатӣ ва гуфтушунид ҳал кунанд. Роҳбарияти СААД бошад, дар сомонаи расмии худ иттилоъ дод, ки нерӯҳои ин созмон ба ин муноқиша дахолат нахоҳанд кард, чун расман Озарбойҷон марзи аз ҷониби ҷомеаи ҷаҳон эътирофшудаи Арманистонро вайрон накардааст.

Гуфтан ба маврид аст, ки ихтилофи Озарбойҷон ва Арманистон сари масъалаи Қаробоғи Кӯҳи беш аз 30 сол шуд, ки идома дорад ва сари чанд вақт ба низоҳои мусаллаҳона мепечад.

Низои охир миёни Арманистон ва Озарбойҷон тирамоҳи соли 2020 ҷараён гирифт. Он замон ҳам ду кишвар бар сари минтақаи баҳсии Қаробоғи Кӯҳӣ шаш ҳафта бо ҳам ҷангиданд. Даргирии тарафҳо бо миёнравии Русия ва бо созиши оташбас поён ёфт. Бино бар он, арманиҳо қаламравҳоеро, ки 30 соли ахир зери назорати худ доштанд, ба Озарбойҷон доданд. Бар асоси тавофуқ, неруҳои Русия оташбаси миёни Арманистону Озарбойҷонро назорат мекунанд.

Дар Telegram, Facebook, Instagram, OK ва ВК бо мо бимонед.