Пеш аз мавсими нав ҳамаи дастаҳои футболи Тоҷикистон аз марҳилаи аввали дарёфти иҷозатнома (литсензия) гузаштанд.
Масъалаи дарёфти иҷозатнома барои иштирок дар мавсими нав дар ҷаласаи Кумитаи иҷроияи Федератсияи футболи Тоҷикистон (ФФТ) баррасӣ шуд.
Тавре ки маркази матбуоти ФФТ хабар медиҳад, маълум шуд, ки якбора ду даста – «Кӯктош» ва «Файзканд» ба мушкилоти ҷиддии молиявӣ дучор гашта, ширкати онҳо дар мавсими нави чемпионати Тоҷикистон зери суол аст.
Аъзои Кумитаи иҷроияи ФФТ пешниҳод карданд, ки то рӯзи душанбе вазъро омӯхта, ба як қарор бирасанд – дар мавсими нави қаҳрамонии Тоҷикистон чанд даста ширкат мекунад ва мусобиқот аз рӯйи кадом формула баргузор мешавад.
Ҳамчунин масъалаи лимити иштироки бозигарони хориҷӣ дар чемпионати Тоҷикистон матраҳ гардида, мисли соли гузашта, дар мавсими нав ҳар як бошгоҳи лигаи олӣ метавонад ба рӯйхати худ ҳадди аксар ҳафт бозигари хориҷиро ворид кунад.
“Аммо бар асоси қарори нави Кумитаи иҷроияи федератсия дар дархости бозӣ шумораи бозигарони хориҷӣ маҳдудият намешавад – акнун ҳамаи ҳафт футболбози хориҷӣ метавонанд дар як вақт дар майдон бошанд”, - омадааст дар хабари Федератсия.
Ғайр аз ин, Шоҳрух Саидзода, узви Кумитаи иҷроияи ФФТ, президенти бошгоҳи «Истиқлол» пешниҳод кард, ки мақоми Ҷоми Тоҷикистон дар соли ҷорӣ боло бурда, фонди ҷоизавии калонтар барои Ҷоми кишвар таъсис дода шавад.
Ҳамчунин дар ҷаласа ба масъалаи таъсиси Маркази тибби варзишӣ дар Тоҷикистон, ки дар он варзишгарон тавонанд пурра хизматрасониҳои тиббиро дастрас намоянд ва барои барқарорсозӣ пас аз ҷароҳат табобат гиранд, таваҷҷуҳ зоҳир шуд.
Бо пешниҳоди аъзои Кумита ин масъала бояд дар якҷоягӣ бо Вазорати тандурустӣ ва ҳифзи иҷтимоии аҳолӣ, Кумитаи кор бо ҷавонон ва варзиш, Кумитаи миллии олимпии Тоҷикистон ва дигар федератсияҳои варзишии кишвар баррасӣ ва ҳал карда шавад.
Қаблан зикр гардида буд, ки чун соли гузашта чемпионати Тоҷикистон дар ду марҳила баргузор мешавад. Дар марҳилаи аввал ҳамаи 10 даста дар ду давр бозӣ мекунанд. Сипас дар марҳилаи дуюм дастаҳо ба ду гурӯҳ тақсим карда мешаванд. Имтиёзҳои дар марҳилаи аввал бадастоварда боқӣ мемонанд.
Аз рӯи натиҷаҳои марҳилаи аввал 5 дастаи беҳтарин дар гурӯҳи “А” дар як давр бозӣ карда, барои ҷойҳои аз 1 то 5-ум рақобат мекунанд.
Боқимонда 5 дастаи дигар дар як давр дар гурӯҳи “Б” бозӣ карда, барои ишғоли зинаҳои аз 6 то 10-ум ва боқӣ мондан дар мавсими оянда дар Лигаи олӣ рақобат мекунанд.
Аз рӯи натиҷаҳои мавсим 2 дастаи зинаи охир Лигаи олиро тарк карда, мавсими навро дар Лигаи якум оғоз мекунанд. Дар мавсими футбол-2023 ҳар кадоме аз дастаҳо 22 бозӣ мегузаронад.
Қобили зикр аст, ки барои иштирок дар чемпионат ҳамаи дастаҳо ӯҳдадоранд, ки маблағи аъзоҳаққӣ пардохт кунанд, ки талаботи ФИФА аст. Имсол он барои дастаи Лигаи олӣ 80 ҳазор сомонӣ ва Лигаи якум - 40 ҳазор сомониро ташкил медиҳад. Ба ивази он бояд ба дастаҳо кумак расонида шавад.
Руcский