Кӯлоб. 7-уми июл. ОИ «Азия-Плюс» - Мутахассисони лабораторияи маҳсулоти ғизоии Раёсати стандартизатсия, сертификатсия ва назорати савдои минтақаи Кӯлоб 20 тоннаву 457 кило орде, ки барои қисми низомӣ таъин гардида буду аллакай дар анборҳо мехобид, вайроншуда ҳисобида, ба қисми низомӣ додани онро боздоштанд.

Сардори Раёсати минақавии «Тоҷикстандарт» Рустам Неъматов зикр кард, ки тайи шаш моҳи соли равон ин бори аввал нест, ки дар минтақа маҳсулот ва моли ғайристандартӣ дарёфт мегардад.

«Аз оғози сол дар лаборатория 389 ташхис гузаронида шуд ва дар 24 ҳолат ба меъёрҳо ҷавобгӯ набудани маҳсулоти ғизоӣ ошкор карда шуд», - гуфт ӯ ва афзуд, ки аз ин маҳсулот 565 килояш равғани пахта, 100 кг маҳсулоти ширӣ, 70 кг қаннодӣ, 90 кг маҳсулоти ҳасиб, 300 кг қанд, 3,5 декалитр спирт, 100 декалитр нӯшокии ғайриспиртӣ, 70 кг чой ва 35 тонна писта мебошанд.

«Санадҳои гайримеъёрӣ будани орд ба прокуратураи ҳарбии гарнизони Кӯлоб ва равғани растанӣ ба прокуратураи ноҳияи Восеъ ирсол гардиданд», - таъкид сохт Р.Неъматов.

Ба қавли ӯ, бӯҳрони энергетикии моҳҳои январ ва феврали соли 2008 ба самаранокии боз ҳам бештари фаъолияти раёсат халал расонидааст.