Душанбе. 13-уми май. Азия-Плюс — Вазири корҳои хориҷии Ҷумҳурии Тоҷикистон Ҳамрохон Зарифӣ бо мақсади иштирок дар кори ҷаласаи Шӯрои вазирони корҳои хориҷии кишварҳои узви Созмони ҳамкории Шанхай ба шаҳри Алмаато сафар намуд.

Тавре аз департаменти иттилооти Вазорати корҳои хориҷии ҷумҳурӣ иттилоъ доданд, дар ҷаласа масъалаи омодагӣ ба нишасти ҷашнии сарони кишварҳои узви созмон ба муносибати 10-солагии таъсисёбии он, ки дар таърихи 15-уми июн дар шаҳри Остона баргузор мешавад, баррасӣ мешавад. «Вазирони корҳои хориҷии кишварҳои узви созмон ҳамчунин лоиҳаҳои ҳуҷҷатҳои ба рӯзномаи нишаст пешбинишударо низ мавриди баррасӣ қарор медиҳанд, ки санади асосии он – Изҳороти 10-солагии СҲШ дар Остона хоҳад буд», - гуфтанд дар вазорат.

Ба иттилои манбаъ, дар изҳороти мазкур фаъолияти созмон дар тӯли 10 соли сипаришуда мавриди таҳлилу баррасӣ қарор гирифта, муносибати он ба вазъ ва масоили муҳими байнулмилалӣ ва нақшаҳои рушди минбаъдаи ҳамкориҳои кишварҳои узви СҲШ таҷассум меёбанд.

Ёдрас мекунем, ки Созмони ҳамкории Шанхай 15-уми июни соли 2001 таъсис ёфта, давлатҳои Русия, Чин, Қазоқистон, Қирғизистон, Тоҷикистон ва Ӯзбекистон узви он мебошанд.