Пулиси Душанбе аз боздошт як ҷавони 28-сола хабар дод, ки, ба гуфтаи ин ниҳод, барои даст доштан дар қаллобӣ дар ҷустуҷӯи расмӣ қарор доштааст.

Раёсати корҳои дохилӣ дар пойтахт имрӯз, 14-уми апрел аз боздоштшуда Аҳмадҷон Ҳасанов ном бурда, навишт, ки ӯ “шаҳрвандонро фиреб дода, бо ваъдаи ба Амрико фиристодан аз ҳар кадоме беш аз 20-ҳазор долларӣ гирифта, ба манфиати худ сарф намудааст”.

Мақомот нагуфтаанд, ки ӯ чанд нафарро "фиреб додааст". Ҳамчунин, маълум нест, ки боздоштшуда аз кай дар ҷустуҷӯ қарор дошт ва мушаххас кай дастгир гардидааст.

Ҳамчунин, назари ин ҷавон ё наздикону пайвандонаш дар робита ба ин қазия дастрас нест.

Мақомот гуфтаанд, ки ҳоло боздоштшуда дар ҳабси пешакӣ қарор дошта, тафтишот дар мавриди  “кирдорҳои қаллобонаи ӯ” идома дорад.

Маълум нест, ки бар зидди ин ҷавон бо кадом модда парванда боз шудааст.

Қаблан мақомот аз боздошти чанд нафари дигар барои фиреби хоҳишмандони кор дар Аврупо хабар дода буданд.

Бино ба маълумоти ВКД Тоҷикистон, соли гузашта 22 ҳазору 315 ҷиноят ба қайд гирифта шудааст, ки 996 ҳолат зиёдтар нисбат ба соли 2023 аст. Миёни ҷиноятҳо қаллобӣ - 3480 ҳолат дар зинаи дуюм қарор дорад. Лекин шумори ҷиноятҳои қаллобии онлайн ва сатҳи ошкоркунии онҳо маълум нест.

Дар Telegram, Facebook ва Instagram бо мо бимонед.